Қазақстанда 2026 жылғы қыркүйекте тұрғын үйді сатып алу-сату бойынша 35 406 мәміле тіркелді. Бұл тамыздағы көрсеткіштен 1,1 пайызға, ал былтырғы қыркүйекпен салыстырғанда 14,3 пайызға аз, деп Malim.kz тілшісі Krisha.kz мәліметіне сүйеніп хабарлайды.
Бір айда елдің сегіз өңірінде, ал бір жылда 16 өңірінде баспана саудасы бәсеңдеген. Жылдық көрсеткіш бойынша ең үлкен төмендеу Астана мен Алматыда байқалды. Дегенмен кейбір өңірлерде тұрғын үй саудасы жанданып келеді.
Қай өңірлерде баспана саудасы азайды?
Тамызбен салыстырғанда мәміле саны ең көп қысқарған өңірлер – Қостанай және Қарағанды облыстары. Бұл өңірлерде көрсеткіш тиісінше 10,2 және 10,1 пайызға төмендеген.
Алматыда мәміле саны 5,7 пайызға, Шымкентте 5,6 пайызға азайған. Астана мен Ақмола облысында да 4,4 пайыздық төмендеу тіркелді.
Ал Түркістан облысында, керісінше, баспана саудасы бір айда 24,8 пайызға өскен. Жамбыл облысында мәміле саны 13,3 пайызға, Жетісу облысында 12,1 пайызға артқан.
Ең көп үй қайда сатылды?
Қыркүйекте тұрғын үйді сатып алу-сату мәмілелерінің саны бойынша Алматы көш бастады. Қалада бір айда 7 248 мәміле тіркелген.
Екінші орында Астана тұр – 6 119 мәміле. Қарағанды облысында 2 540 мәміле жасалған.
Ең төмен көрсеткіш Ұлытау облысында тіркелді. Мұнда бір айда 280 баспана сатылған.
Қандай баспана жиі сатып алынған?
Қыркүйекте елде пәтер сатып алу-сатуға қатысты 27 096 мәміле жасалған. Ал жеке тұрғын үйлер бойынша 8 310 мәміле тіркелген.
Пәтерлер арасында бір бөлмелі баспана жиі сатылған – 10 434 мәміле. Екі бөлмелі пәтерлер бойынша 10 006, үш бөлмелі пәтерлер бойынша 5 444 мәміле жасалған.
Бір жылда не өзгерді?
2025 жылғы қыркүйекпен салыстырғанда елдегі тұрғын үй мәмілелерінің саны 14,3 пайызға азайған.
Ең үлкен төмендеу Астанада байқалды: мұнда баспана саудасы бір жылда 29,2 пайызға қысқарған. Қызылорда облысында көрсеткіш 21,3 пайызға, Алматыда 18,2 пайызға төмендеген.
Жылдық өсім төрт өңірде ғана тіркелген. Түркістан облысында мәміле саны 24,7 пайызға, Жетісу облысында 4,9 пайызға, Солтүстік Қазақстан облысында 4,6 пайызға, Жамбыл облысында 4 пайызға артқан.
Жалпы, 2026 жылдың тоғыз айында Қазақстанда тұрғын үйді сатып алу-сату бойынша 296 657 мәміле тіркелді. Бұл 2025 жылдың сәйкес кезеңінен 5,6 пайызға аз.
