Мақпал Жүнісова өнерін неге шетелде дамытпағанын айтты

Халық әртісі Мақпал Жүнісова өзге әріптестері секілді шығармашылығын неліктен шетелде дамытпағанын түсіндірді, деп хабарлайды Malim.kz.

Өнер иесі шетелде де атын шығаруға мүмкіндігі болғанын айтады. Дегенмен ол туған елінде қалуды құп көргенін алға тартты.

Қазақ елі үшін қызмет еткен әншімін. Мына тұрған Мәскеуде де концерт беріп көрмеген адаммын. Мен тек Қазақстанды араладым. Ауылдарды, станцияларды аралап шықтым. Тіпті далада да, комбайнның жанында да ән салдым. Сондықтан еліме деген махаббатым өте биік. Өз жерімде өзімді суда жүзген балықтай сезінемін. Шетелге барып, сол жақта атымды шығаруға болар еді. Менде ондай жағдай болды. Жолдасым бастық болды. «Мені шетелге шығарып, мына Мәскеуге апарып концертімді жаса» десем, орындайтын еді. Бірақ мен ондайға бармадым. Алдымен өз елімнің батасын алайын дедім. Өз елімде қазақтың әнінің шыңына шығайын дедім, - деді өнер иесі «Оян» бағдарламасына берген сұхбатында.

Фото: Instagram/zhunusova.makpal