Қазақстанда қанша адамның түрмеден қашқаны анықталды 

Ішкі істер министрлігінің Қылмыстық-атқару жүйесі комитеті  өкілдері Қазақстанда кейінгі жылдары қанша тұтқын түрмеден қашқанын мәлімдеді. 

Комитет ақпаратына сенсек,  2017 жылдан 2023 жылдың наурызына дейінгі аралықта қылмыстық-атқару жүйесі мекемелерінен 23 қашу дерегі болған. Жедел-іздестіру іс-шаралары барысында барлық қашқын бірінші тәулікте ұсталып, бас бостандығынан айыру орындарына қайтарылған. 

Әр қашу оқиғасы бойынша тергеу жүргізілген. Сарапшылар бас бостандығынан айыру орындарынан қашу ғимараттар мен күзет құрылымдарының техникалық беріктігінің жеткіліксіздігінен болғанын анықтаған. Қазір осыған байланысты ҚАЖК «қашуға қарсы» жұмыс жүргізіп жатыр.

Ведомствоның баспасөз қызметі 2023 жылдың аяғына дейін мекемелерде үздіксіз бейнебақылау жүйесін енгізу бойынша монтаждау жұмыстары аяқталатынына сендірді.  

Сонымен қатар, Бас прокуратураның баспасөз қызметі Қазақстанда жазасын өтеп жатқан тұтқындардың санын жариялады. Биылғы 10 сәуірдегі жағдай бойынша, қылмыстық-атқару жүйесі мекемелерінде 34 702 адам бар, оның 6 567-сі тергеу изоляторларында, 28 135-і түзеу мекемелерінде.  Бұл туралы Қылмыстық-атқару жүйесі комитеті  Tengrinews.kz ресми сауалына берген жауабында айтты.