Назарбевтың бұрынғы құдасы 6 жылға сотталды

Бас прокуратура Қайрат Боранбаевтың  6 жылға бас бостандығынан айырылғанын хабарлады. Шенеунікке қатысты  істі Астана сотының қылмыстық істер жөніндегі апелляциялық алқасы   қарады.  

Астана қаласының прокуратурасы Қайрат Боранбаевпен және басқа сотталушылармен «ҚазТрансГаз» АҚ-ның ақшалай қаржысын иемденіп және оларды заңдастыруға қатысты ісі бойынша кінәні мойындау туралы мәміле нысанында процестік келісім жасады.

Жәбірленуші тараптардың келісімімен қала прокуратурасы сотталушылардың кінәні толық мойындап, 14,5 миллиард теңгенің залалын өтегенін ескеріп, процестік келісім жасау туралы шешім қабылдады. Шешім бойынша, Қайрат Боранбаев пен Р. Нахановтың мүлкі тәркіленіп, 6 жыл бас бостандығынан айырып, ал Т. Жанұзақты 5 жыл бас бостандығынан айыра отырып, үшеуі де мемлекеттік қызметте қызмет атқару құқығынан өмір бойына айыру жазасына келісті.

Процестік келісім қарау және оны бекіту туралы шешімді қабылдау үшін сотқа жолданды. Еске салайық, биыл 22 тамызда апелляциялық сатыдағы сотта істі қарау барысында сотталушылар кінәсін мойындау туралы мәміле нысанындағы процестік келісім жасасу туралы өтінішхат берген болатын.

14 қыркүйекте Қаржы мониторингі агенттігі Қайрат Боранбаев мемлекетке өз еркімен 90 миллиард теңгенің мүлкін қайтарғанын хабарлады.