"Жігіттер" тобының әншісі Ердос Қанаев әлеуметтік желіде сырт келбетіне қатысты жазылған пікірлерге жауап берді, деп хабарлайды Malim.kz.
Өнер иесі кейінгі видеоларының біріне желі қолданушылары "қартайып кетіпті" деген мазмұнда пікір қалдырғанын айтты. Осыдан кейін ол өмірінде болған ауыр жағдайларды еске алып, адамның сырт келбетіне тек жас емес, бастан өткен қайғы да әсер ететінін жеткізді.
"Алдыңғы рилста "Қартайып кетіпсіз", "Бұл да қартайыпты" деген сынды пікірлер жазылған екен. Үміт еткен балаң 10 жасында бақилық болса, артынан асқар тау Әкең о дүниелік болса қартаясың. Көз ілеспес шапшаңдықпен қартаяды екенсің. Күліп жүрген адамның бәрі бақытты емес, түсінгенім!" – деп жазды ол.
Әншінің жазбасы оқырмандарға әсер етіп, көпшілік оған қолдау білдірді. Желі қолданушылары адамның өміріндегі ауыр оқиғалар кейде уақыттан да қатты өзгертетінін айтып, жылы лебіздерін қалдырған.
Ердос Қанаевтың Әбдірахим, Диасыл және Асылым есімді балалары бар. Оның үлкен ұлы Әбдірахим 2020 жылы 9 жасында дүниеден өткен.
Еске сала кетейік, Ердос Қанаев әлеуметтік желіде әріптестерінің қызықты сәтін жариялаған еді.
Ердос Қанаев кім?
Ердос Қанаев – Қазақстан эстрадасындағы "Жігіттер" квартетінің мүшесі ретінде танылған әнші. Ашық деректерде оның туған жері Түркістан облысының Ордабасы ауданына қарасты Шұбар елді мекені деп көрсетіледі. Арнайы музыкалық білім алмағанымен, жоғары оқу орнын қазақ тілі мен әдебиеті пәнінің мұғалімі мамандығы бойынша тәмамдағаны жөнінде дерек бар.
Оның кәсіби сахнадағы негізгі шығармашылық жолы 2003 жылы құрылған "Жігіттер" тобымен байланысты. Топ сол жылы "Арай-2003" республикалық байқауына қатысып, бас жүлде иеленген.Кейін квартет "Ерке қыз" әні арқылы қалың көрерменге кеңінен танылды. 2004 жылы аталған әнге топтың алғашқы бейнебаяны түсірілгені туралы дерек бар.
2006 жылы "Жігіттер" квартеті Алматыда алғашқы жеке концертін өткізген. Ердос Қанаев топтың ұзақ жылдар бойы өнер көрсетіп келе жатқан тұрақты мүшелерінің бірі саналады. 2024 жылы "Қызық Times" бағдарламасына қатысқан квартет шығармашылық жолының 20 жылдық кезеңін атап өтті.
Ердос Қанаев жеке өмірі мен отбасындағы ауыр сынақтар туралы да бірнеше рет ашық айтқан. "Urpaq" подкастында ол 2010 жылы 26 жасында алғаш рет әке атанғанын мәлімдеген. Тұңғыш ұлы Әбдірахим дүниеге келгеннен кейін денсаулығына байланысты жансақтау бөліміне түсіп, ұзақ уақыт ем қабылдаған. Әншінің айтуынша, отбасы ұлының денсаулығы үшін он жыл бойы аурухана мен үйдің арасында жүрген. Әбдірахим 2020 жылы 10 жасында өмірден өткен.
2023 жылы Ердос Қанаев қызды болғанын әлеуметтік желідегі парақшасында өзі хабарлаған. Ашық деректерде оның Диасыл және Асылым есімді балаларының бары да көрсетіледі. 2025 жылдың қазанында әншінің әкесі Әмзехан Қанаавтың дүниеден өткені туралы оның әріптесі Бағлан Әбдірайымов хабарлады. Кейін Ердос Қанаав әкесі мен өмірден өткен ұлына деген сағынышын әлеуметтік желідегі жазбаларында бірнеше рет бөлісті. 2026 жылы сырт келбетіне қатысты пікірлерге жауап берген әнші адамның түр-тұлғасына жас қана емес, өміріндегі ауыр оқиғалар да әсер ететінін айтып, баласы мен әкесінен айырылу өзін қатты өзгерткенін жеткізді.
