"Өнер қырандары" театрының актері Жанболат Найзабеков әріптесі Мадияр Серікбаевтың басынан өткен ауыр жағдай туралы айтып берді. Актердің анасы сахнада өнер көрсетіп жатқан сәтінде дүниеден озған. Алайда театр ұжымы бұл хабарды қойылым аяқталғанша жеткізбеуді ұйғарған, деп хабарлайды Malim.kz.
Жанболат Найзабеков бұл оқиғаны журналист Аман Тасығанға берген сұхбатында еске алды.
Оның сөзінше, сол күні Мадияр Серікбаев сахнада анасының қабірінің басына келген ұлдың рөлін сомдап жатқан. Кейіпкерінің "Анашым, кешірші" деген сөзін айтып тұрған сәтінде оның отбасынан қаралы хабар жеткен.
"Мадияр анасының қабірінің басына келіп тұрған баланы ойнап жатыр. "Анашым, кешірші" деп. Осы кезде менің телефоным шырылдады. Мәкеңе әпкесі қоңырау шалып, "мамадан айырылып қалдық" деді", – деп еске алды актер.
Алайда театр ұжымы ауыр хабарды Мадиярға бірден естіртпеген. Әріптестері оның сахнадағы өнерін жалғастыра алмай қалуы мүмкін екенін ойлап, қойылымның аяқталуын күткен.
"Біз оған екі сеанс бойы ештеңе айтпадық. Кешкі сағат ондар шамасында концерт аяқталды. Содан кейін Мәкең гримеркаға келіп, бетін сүртіп отырды. Ол мұндай жаңалықты күтпеген еді", – деді Жанболат Найзабеков.
Актердің айтуынша, Мадияр Серікбаевтың анасы бұған дейін ұзақ уақыт ауырған. Өмірінің соңғы кезеңінде денсаулығы күрт нашарлап, өздігінен жүре алмай қалған.
Қаралы хабарды "Өнер қырандары" театрының алты актері естіген. Олар әріптестерінен мұндай ауыр жағдайды жасырып отырғандары үшін іштей қиналған. Дегенмен залдағы көрермендер мен қойылымның жалғасып жатқанын ескеріп, хабарды кейінірек жеткізу туралы шешім қабылдаған.
Жанболат Найзабеков кім?
Жанболат Найзабеков – қазақстандық танымал актер, әзілкеш, продюсер және "Өнер қырандары" әзіл-сықақ театрының мүшесі. Ол 1988 жылы Атырау облысының Құлсары қаласында дүниеге келген.
Өнер иесі шығармашылық жолын "Жайдарман" сахнасынан бастап, кейін "Өнер қырандары" театрының құрамында кеңінен танылды. Театрдағы түрлі қойылымдарда өнер көрсетіп, көрермендердің ықыласына бөленді.
Жанболат Найзабеков кейін кино саласына бет бұрып, актерлікпен қатар продюсерлік қызметті де қолға алды. Ол "ТойХана", "Ажырасам", "Болған оқиға" және "Coco & Janbo" секілді фильмдерге қатысқан. 2023 жылы жарық көрген "Coco & Janbo" фильміне продюсерлік еткен.
Актер әлеуметтік желілерде де белсенді. Ол шығармашылығына, отбасылық өміріне және өнердегі әріптестеріне қатысты жаңалықтарды оқырмандарымен бөлісіп тұрады.
Жанболат Найзабеков жұбайы Іңкәрмен бірге бес ұл тәрбиелеп отыр. Өнер иесі түрлі сұхбаттарында өміріндегі қиындықтар мен шығармашылық жолындағы естеліктерін ашық айтып келеді.
Мадияр Серікбаев кім?
Мадияр Серікбаев – қазақстандық актер, режиссер және танымал "Өнер қырандары" әзіл-сықақ театрының жетекшісі. Ол театр сахнасындағы тәрбиелік мәні бар қойылымдарымен көпшілікке танылған өнер иелерінің бірі.
Мадияр Серікбаев Темірбек Жүргенов атындағы Қазақ ұлттық өнер академиясында білім алған. Студенттік жылдары шығармашылық жолын КВН сахнасынан бастап, кейін әріптестерімен бірге "Өнер қырандары" театрын құрған.
Театр ұжымы алғашында әзіл-сықақ қойылымдарымен танылса, кейін қоғамдағы өзекті мәселелерді, отбасылық құндылықтарды, адамгершілік пен рухани тәрбиені қозғайтын шығармаларға басымдық бере бастады.
Мадияр Серікбаев театрдағы қызметімен қатар кино саласында да еңбек етіп жүр. Ол әртүрлі фильмдерге түсіп, актерлік шеберлігін кино арқылы да танытып келеді.
Өнер иесінің жұбайы – актриса Дана Тұрарбек. Екеуі студент кездерінде танысып, шаңырақ көтерген. Дана да "Өнер қырандары" театрының құрамында өнер көрсетеді.
Мадияр Серікбаев сұхбаттарында шығармашылық жолы, отбасылық өмірі және сахнадағы әріптестері туралы жиі әңгімелейді.
