1903 жылы жіберілген ашықхат көрсетілген мекенжайға тек 2024 жылы жеткен. Арада 121 жыл өткенде табылған хаттың тарихы күтпеген жалғасын тауып, бір әулеттің бір-бірін бұрын көрмеген ұрпақтарын кездестірді, деп Malim.kz тілшісі Sky News басылымына сілтеме жасап хабарлайды.
Күнделікті хаттардың арасынан шыққан
Қаржы ұйымының қызметкерлері әдеттегі поштаны сұрыптап отырып, ескі ашықхатқа тап болған. Қаржы мен жинаққа қатысты құжаттардың арасынан шыққан сарғайған қағаз олардың назарын бірден аударған.
Ашықхаттағы пошта мөрінде 1903 жылғы 3 тамыз деген дата тұрған. Ал оны мекемеге пошташы 2024 жылғы 16 тамызда жеткізген.
Хат Лидия Дэвис есімді бойжеткенге арналған. Ол хат жіберілген кезде сол мекенжайда тұрған болуы мүмкін. Арада ғасырдан астам уақыт өткенде бұл орында қаржы ұйымы жұмыс істеп жатқан.
Ашықхатты кім жазған?
Хатты Эварт есімді бала жазған. Кейін оның Лидияның бауыры екені анықталған.
Жолдауда ол әлдебір заттың жұбын таба алмағанын айтып, кешірім сұраған. Сондай-ақ үйдегілердің жағдайы жақсы болуын тілеп, өзінің қалтасында жолақысынан бөлек аздаған ақшасы барын жеткізген.
Бір қарағанда, бұл – бауырына жазылған қарапайым хабарлама. Алайда уақыт өте келе ол отбасының өткен өмірінен сыр шертетін құнды естелікке айналған.
Бір ашықхат туыстарды табыстырған
Мекеме қызметкерлері хат иесінің ұрпақтарын табу үшін оқиғаны көпшілікке жариялаған. Жаңалықты көрген адамдар арасынан өз туыстарының есімдерін танығандар табылған.
Солардың бірі – Хелен Робертс. Оның атасы ашықхатты жіберген Эварт пен хат арналған Лидияның бауыры болған.
Осы ізденістің нәтижесінде әулеттің бір-бірін бұрын кездестірмеген мүшелері бас қосқан. Ғасырдан астам уақыт бұрын жазылған бірнеше жол ұрпақтар арасындағы байланысты қайта жалғауға себеп болған.
Хат 121 жыл бойы қайда жүрген?
Оқиғаның ең жұмбақ тұсы – осы. Ашықхаттың сонша уақыт қайда сақталғаны және поштаға қалай түскені анықталмаған.
Пошта қызметінің түсіндіруінше, оның бір ғасыр бойы жеткізілмей жатуы екіталай. Ашықхат кейінірек пошта жүйесіне қайта түскен болуы мүмкін. Ал жүйеге қабылданған жөнелтілімді қызметкерлер көрсетілген мекенжайға жеткізуге міндетті.
Сондықтан "121 жыл жолда жүрген хат" дегеннен гөрі, 121 жылдан кейін қайта табылып, мекенжайына жеткізілген ашықхат деген дұрыс. Оның аралықтағы тағдыры белгісіз болғанымен, соңғы сапары бір отбасы үшін күтпеген кездесуге ұласқан.
