Семейдегі Shygys Mall сауда ойын-сауық орталығында әйелдің аяғы екі эскалатордың арасындағы саңылауға түсіп кетіп, құтқарушылардың көмегі қажет болды, деп хабарлайды Malim.kz.
Куәгерлердің мәліметінше, оқиға кеше болған. Әйел өздігінен шыға алмағандықтан, оқиға орнына төтенше жағдайлар қызметінің мамандары шақырылды.
Абай облысының Төтенше жағдайлар департаменті құтқарушылар арнайы гидравликалық құралдың көмегімен екі эскалатор арасындағы технологиялық саңылауды кеңейтіп, 1990 жылы туған әйелдің аяғын босатқанын хабарлады.
Құтқару жұмыстарынан кейін әйел жедел жәрдем қызметкерлеріне тапсырылды. Дәрігерлер оған қажетті медициналық көмек көрсетіп, жағдайын тексерді.
