Алматыда ковидпен ауырып жатқан науқастар дәрігерлердің шарасыздығына наразылық білдірді.
КазТАГ басылымының мәліметінше, Алматы қаласындағы «Халық Арена» спорт кешенінде орналасқан госпитальде ем алып жатқан науқарстардың бірі «70 науқасты 1 дәрігер қарайтынын» айтып, шағымданған.
«Мен «Халық Аренаның» блок «Б» № 4 бөлімшесіне 12 сәуір күні сағат 16:00-де түстім. Сол уақыттан бері мені әлі тексерген жоқ. Жағдайым ауыр. Дәрігерлер үлгермей жатыр. 70 науқасқа бір дәрігер. Барлығы шаршаған», - дейді аты-жөнін айтпауды өтінген науқас.
Әзірге Алматы қаласы әкімдігі мен денсаулық сақтау министрлігі аталмыш жағдайға байланысты ешқандай түсініктеме берген жоқ. БАҚ өкілдеріне тек жағдайды егжей-тегжейлі тексеретіндерін айтты.
«Халық Арена» кешеніндегі госпитальге ковиднауқастарды наурыздың 31-і күні жатқыза бастаған. Қалалық әкімдік «кешенде науқастарды емдеуге балық жағдай жасалғанын, 1 мың адамға арналған орын бар» екендігін мәлімдеген.
Коронавирустың таралуы бойынша ШҚО мен Түркістан облыстары «жасыл аймақта». Шымкент қаласы, Қызылорда және Павлодар, Қостанай, Жамбыл, Маңғыстау, Солтүстік Қазақстан облыстары «сары», ал Атырау, БҚО, Ақтөбе, Ақмола, Алматы, Қарағанды облыстары, Алматы қаласы мен астана «қызыл аймақта».
