Бүгін Қазақстан Республикасы Парламенті Сенаты өзгерістер мен толықтырулар енген «Саяси партиялар туралы» заңды қабылдады.
Депутаттар бұл жаңа заң жобасы саяси партия институтын дамытып, қоғамды демократияландыра түседі дейді.
«Президентіміздің ұсынысымен бүгін қабылданып отырған заңдар елдің саяси өмірінде ерекше маңызға ие. Саяси партияларды құру мен тіркеу талабы едәуір жеңілдетіліп отыр. Партияларды тіркеудің талаптық шегі төмендетілді. Қабылданған заңдар көп партиялық жүйені одан әрі нығайтуға септігін тигізетіні сөзсіз. Сондай-ақ, партиялардың сайлау тізімінде әйелдер мен жастар үшін 30 пайыздық міндетті квота белгіленді. Бұл әйел адамдардың және жастарға еліміздің қоғамдық-саяси өміріне белсене қатысу үшін қосымша мүмкіндік береді. Мұндай өзгертулерді демократиялық даму жолындағы нақты қадам деп қарастыруымыз керек. Олар саяси жүйемізді әрі қарай дамытуға үлес қосады деп сенеміз», - деді Сенат төрағасы Мәулен Әшімбаев.
Бұл заңдағы өзгерістер мен толықтыруларға президент Қасым-Жомарт ТОҚАЕВ мұрындық болған. Былтыр 2019 жылдың желтоқсан айында мемлекет басшысы Ұлттық қоғамдық сенім кеңесінің екінші отырысында саяси реформалар пакеті аясында ұсынылған. Енді саяи партия ашу үшін 40 мың емес, 20 мың адамның болуы жетіп жатыр. Сарапшылар бұл саяси аренада жаңа партиялардың пайда болуына оң ықпал етеді дейді. Сондай-ақ, заңға сәйкес әйелдер мен жастар еліміздің қоғамдық-саяси өміріне белсенді араласатын болады. Яғни сайлауға түскен партиялардың тізімінде әйелдер мен жастардың үлесі міндетті түрде 30 пайызды құрау керек.
С. НАЗАРОВА
Фото: parlam.kz
