Шетелде нәпақа тамабын деп қаза болған
Қырғыз үкіметі биыл жарты жылда шетелде қаза болған 200-ден астам азаматын еліне әкеліп жерледі.
Бұл мәліметті Қырғыз еліндегі Азаттық еңбек, көші-қон және әлеуметтік қамсыздандыру министрлігінің баспасөз қызметінен алған. Қырғызстан сыртқы істер министрлігінің мәліметінше, былтыр шетелден 350 қырғызстандықтың мәйіті елге жеткізілген. Оның 200-ден астамы Ресейде қаза болған. Биыл әкелінгендердің қаншасы Ресейде қаза болғаны белгісіз. Ол туралы мәлімет айтылмайды.
Ал 2021 жылы Қырғызстанға 540 мәйіт жеткізілген. Мәйіттерді елге жеткізуге мемлекет бюджетінен 45 миллион 270 мың сом жұмсалған. Шетелде қаза болған қырғыз азаматтарының сүйегін елге жеткізу еңбек, көші-қон және әлеуметтік қамсыздандыру министрлігі мен шетел консулдықтары арқылы жүзеге асады.
Қазіргі таңда Қырғызстанның миллионнан астам азаматы Ресейде нәпақа тауып жүр. 30 жылда 650 мыңнан астам қырғызстандық Ресей азаматтығын алған. Жақында Ресей думасының депутаты осы елде жұмыс істеп, төлқұжатын алған Орталық Азия азаматтарын да Украинаға соғысқа жіберу керек деген бастама көтеріп отыр. Сонымен қатар Ресей азаматтығын алу үшін шетел азаматтары «арнайы әскери операция» деп аталатын соғысқа бір жыл қатысуы тиіс және орыс түрмесіне түскен мигранттарға да соғысқа барса ақталып және азаматтық алуына жағдай жасалынады деген ақпарат бар.
