«Елорда кубогы»: қазақстандық үш боксшы финалға шықты
Екі боксшының қарсыластары айқасқа шығудан бас тартты.
![](/images/article-img/1600/21969-1715939858-m.jpg)
Қазақстандық үш боксшы «Елорда кубогының» финалына шықты, деп хабарлайды Malim.kz.
51 келіде Сәкен Бибосынов финалдың жолдамасын жапониялық Соуши Макиномен сарапқа салды. Үш раунд қорытындысы бойынша төрешілер Сәкенді жеңімпаз деп тапты.
Айта кетейік, Сәкен Бибосынов – Токиода өткен Олимпиада ойындарының жүлдегері, 2021 жылғы әлем чемпионы.
Ал Махмұд Сабырхан мен Асланбек Шымбергенов жекпе-жексіз-ақ финалда өнер көрсетуге мүмкіндік алды.
57 келіге дейінгі салмақта Сабырхан жартылай финалда отандасы Асылжан Серікбаймен, ал 71 келінің өкілі Шымбергенов Темірхан Тезекпен бокстасуы керек еді. Алайда екеуінің де қарсыластары жекпе-жекке шығудан бас тартып, көшбасшылар енді алтынға таласады.
Айта кетейік, Шымбергенов – Қазақстан құрамасының капитаны.
«Елорда кубогының» финалдық кездесулері 18 мамырда өтеді.
Фото: ҚР ҰОК