«Қазақстандағылар күлген еді». Өзбекстанның бас бапкері өзін сынап жатқандарға жауап берді

Бокстан Өзбекстан құрамасының бас бапкері Толқын Қылышев «Уақыт көрсетеді» YouTube арнасына берген сұхбатында Париж олимпиадасындағы жетістікке қалай жеткенін айтып берді, деп хабарлайды Malim.kz.

Бас бапкердің айтуынша, Өзбекстан құрамасы алтын медальді сатып алған деп сын айтқандар көбейген. Ол бапкер ретінде әу бастан 7 алтын алуды мақсат еткенін атап өтті.

«Олимпиадада бес алтынға ие болдық. Қолынан келмегендер әр нәрсені айтып жатыр. Не айтатындарын өздері білмейді. Амал жоқ, осылай деп айтады. Егер өздері чемпион болса, олардың жеңімпаз болғаны есептеледі де, біздікі есептелмей ме?! Біз жеті алтын аламыз деп күш салдық. Біздің 7 боксшымызға қазіргі уақытта әлемде тең келер мықты жоқ деп нық сеніммен айта аламын. Кез келгеніне жауап беремін. Жарысты орта жолдан аяқтаған Руслан мен Турабек те жеңіске лайық еді», - деді Толқын Қылышев.

Бас бапкер ішіндегі жан сырын ақтарып, мақсатының айқын болғанын айтады.

«Негізі біз жеті алтын медаль алатын едік. Мен осы уақытқа дейін бұл нәрсені айтып келдім. Қазақстанның блогерлері «Толқын бес алтын аламын деп жатыр», - деп күлген еді. Мен бес емес, жеті алтын алғым келді. Бірақ бес алтын еншіледік. Мен қатты кетіп отырған жоқпын, тек ішімдегі дүниені айттым», - деді Толқын Қылышев.