«Шахматшы алдағы қадамын жоспарлауы керек». Бибісара Асаубаева тағы да жазба жариялады
Бұл бәріне сабақ болсын
Шахматшы Бибісара Асаубаева Жансая Әбдімәлік екеуінің арасында болған түсінбестікке қатысты пікір білдіріп, желіге жазба жариялады. Ол осылайша мәселеге нүкте қойғандай болды.
«Кеше қатты ашуланып кеткен шығармын (сол үшін түрлі хейттер алдым). Бұл бәріне сабақ болсын. Шахматшы алдағы қадамдарын алдын ала жоспарлап отыруы керек, ол ең алдымен, өмірде қажет дүние, қателессең опық жеуің мүмкін. Егер қателескен тұсым болса оны мойындауға дайынмын», - деді ол.
Асаубаева Нью-Делиде болған келеңсіз жайт ендігәрі қайталанбауын өтініп, турнирді ың-шыңсыз өткізгісі келетінін жеткізді.
«Ұйымдастыру, ұйқы, көз жас, жанжал, толассыз уәделер мен құр үміт беру болмаса екен. Жай ғана ойнап, рекорд орнатып, елімізді танытып, жақындарыңды қуантқың келеді. Осы жерге сол үшін келдік. Ондай мүмкіндігіміз болады деп үміттенемін. Қасиетті Рамазан айында жамандық ойламаған дұрыс. Ренжіткен адамдарым болса кешірім сұраймын. Ондай мақсатым болған жоқ», - дейді Бибісара.
Еске салайық, қазақстандық шахматшылар Бибісара Асаубаева мен Жансая Әбдімәлік Үндістанның Нью-Дели қаласында шахматтан Гран-при турниріндегі жағдайға байланысты тәжікелесіп қалған еді.
Артынша, Халықаралық шахмат федерациясының (ФИДЕ) президенті Аркадий Дворкович Үндістанда өткен әйелдер Гран-приінің 11 қатысушысына жергілікті ұйымдастырушылар жіберген ағаттықтар үшін кешірім сұраған.
Фото: esquire.kz
