Туниске Олимпиада алтынын әперген Есбол Сұлтанов Қазақстанға оралады
Бұған дейін Тунис таэквандо спортынан Олимпиада алтынын иеленбеген болатын
Парижде өткен олимпиадада таэквандодан Тунис құрамасына тарихи екі жүлдені алып берген Есбол Сұлтанов Қазақстан ұлттық құрамасының бас бапкері болды, деп хабарлайды Malim.kz.
Тунис таэквандо құрамасының бас бапкері Есбол Сұлтановтың жетекшілігімен ел тарихында тұңғыш рет Олимпиада ойындарында алтын және күміс медаль жеңіп, жалпыкомандалық есепте төртінші орынға табан тіреді. Бұған дейін Тунис таэквандо спортынан Олимпиада алтынын иеленбеген болатын. Есбол Сұлтанов Тунис құрамасымен келісімшартқа 2023 жылдың қыркүйегінде қол қойып, жұмысын бастаған. Олимпиадаға дейін ол командаға Гран-при кезеңдерінде екі алтын медаль жеңіп алуға көмектесіп, бұл жеңістер Тунис үшін тарихи оқиғаға айналды.
Сонымен қатар, Гонконгта өткен Дүниежүзілік таэквандо федерациясының іс-шарасында Есбол Сұлтанов «2024 жылдың ең үздік бапкері» атағына лайық деп танылып, арнайы марапатқа ие болды.
Қазақстан Республикасының Президенті Қасым-Жомарт Тоқаев та Есбол Сұлтановтың бұл жетістігін жоғары бағалап, еліміздегі бапкерлерге қолдау көрсету қажеттігін атап өткен болатын.
Фото: ҰОК
