Танымал әнші Жанар Айжанова үйлену тойларында торт кесіп, оны екі жақтың ата-анасына кезекпен ұсыну рәсіміне қатысты пікір білдірді. Өнер иесі Жанерке Сейфуллинаның "Айтарым бар" сұхбатында кейде осындай ұсақ нәрсенің өзі ренішке ұласып, жас жұбайлардың қарым-қатынасына әсер ететінін айтты, деп хабарлайды Malim.kz.
Әншінің сөзінше, ол тойларға жиі қатысады, кейде асаба ретінде де шақырылады. Сондықтан мерекелік кештерде қайталанатын көріністерді жақсы біледі. Соның ішінде екі жастың торты ортаға әкелінген сәтте ата-аналардың араласуы оған ұнамайды.
"Үйлену тойларында жек көретін нәрсем – әлеуметтік желіні ашсам, мына торт бәле болды. Осы тортты бермей-ақ қойса деп ойлаймын. Мен өзім көп жүремін, кейде асаба қылып та шақырады. "Екі жастың тәтті торты келе жатыр" деп, ананың әке-шешесі, мынаның әке-шешесі жетіп келеді", – деді Жанар Айжанова.
Оның айтуынша, тортты кімге бірінші беру керектігіне қатысты түсініспеушілік кей отбасыларда үлкен дауға айналады. Әнші мұндай реніштің салмағы ақырында шаңырақ көтерген екі жасқа түсетінін жеткізді.
"Торттың кесірінен қырғын болып, ажырасуға дейін барып жатады. Торт жемей жүргендей, екі жас ауыз тисін де, даяшыларға берсін", – деді ол.
Бұл – әншінің сұхбатта айтқан пікірі. Ол нақты бір отбасының оқиғасын атамай, өзі байқаған той көріністеріне қатысты көзқарасын білдірді.
Жанар Айжанова торттан дәм татуды ата-аналар арасында кезек таластыратын рәсімге айналдырудың қажеті жоқ деп есептейді. Оның сөзінше, күйеу жігіт өз ата-анасына ұсынғаннан кейін, қалыңдықты да анасы шақырып алатын жағдайлар кездеседі. Әнші осы әрекеттің мәніне күмән келтірді.
"Әке-шешесіне берген соң, қызды да шешесі шақырады. Не әдет? Ырым болсын деп кішкентай балаларға берсін. Қазіргі заманның тозығы деп айтар едім. Екі балаға кесірі тиіп жатыр", – деді өнер иесі.
Әнші тортты екі жастың өздері кесіп, ауыз тигенінен кейін қонақтарға таратып беруді ұсынды. Ал ырым жасағысы келгендер оны балаларға ұсынса болады деген ой айтты. Сұхбаттағы пікірінің өзегі — тойдағы болмашы әрекет үшін ренжісіп, жас отбасының қуанышын дауға айналдырмау.
Жанар Айжанова кім?
Жанар Айжанова – әнші, актриса әрі тележүргізуші. Ол 1968 жылы Ақтөбе облысы Шалқар ауданының Тұмалыкөл ауылында дүниеге келген. 1995 жылы қазіргі Абай атындағы Қазақ ұлттық педагогикалық университетінің музыка факультетін тәмамдаған.
Өнердегі еңбек жолын ерте бастаған. 1985-1986 жылдары Шалқар аудандық мәдениет үйінде автоклуб меңгерушісі болып жұмыс істеген. Бұл қызмет барысында ауылдарды аралап, ән айтып, мәдени шараларға қатысқан. Кейін кәсіби сахнаға бет бұрып, 1991-2000 жылдары Сүйінбай атындағы Алматы облыстық филармониясында, "Адырна" фольклорлық-этнографиялық ансамблінде еңбек еткен.
Оның репертуарында халықтық сарынға жақын шығармалар, лирикалық әндер мен өсиетке құрылған туындылар бар. Apple Music платформасында Жанар Айжанованың орындауындағы "Балқадиша", "Махаббат назы", "Құрдасым", "Бәрінен де сен сұлу", "Қазақ қызы", "Ауылым әнім", "Тобылғы сай" және "Әй-әй бөпем" секілді әндер жарияланған. Бұл туындылар әншінің репертуары махаббат, туған жер және ұлттық ән мұрасы тақырыптарын қамтитынын көрсетеді.
Өнер иесінің орындауындағы "Ана", "Ана туралы толғау", "Зарлы ана" шығармалары да музыкалық платформада қолжетімді. Сондай-ақ оның әндері қатарында «Жігіттерге өсиет» бар. Осы туындылар арқылы әнші ана тақырыбына, адамгершілік пен өмірлік өнегеге арналған шығармаларды тыңдарманға ұсынады.
