Дональд Трамп НАТО-дағы одақтастарын Вашингтонға Ормуз бұғазы арқылы танкерлер мен басқа да сауда кемелерінің өтуін қамтамасыз етуге көмектесуден бас тартқаны үшін қатаң сынға алды. Алайда сонымен бірге ол АҚШ ешкімнің көмегіне мұқтаж емес екенін мәлімдеді.
Бұған дейін АҚШ президенті әлемнің бірнеше елінен, соның ішінде НАТО мүшелерінен, Ормуз бұғазындағы қауіпсіз кеме қатынасын қамтамасыз ету үшін өздерінің әскери кемелерін жіберуді сұраған болатын. Бұл маңызды теңіз жолының жабылуы мұнай бағасының күрт өсуіне себеп болды.
Сейсенбі күні Трамп өзінің Truth Social әлеуметтік желісінде ұзақ жазба жариялап, «НАТО-дағы біздің “одақтастарымыздың” көпшілігі АҚШ-қа Иранның террористік режиміне қарсы әскери операцияға қатысқысы келмейтінін хабарлады» деді.
«Олардың әрекеттері мені таңғалдырмайды, өйткені мен әрдайым НАТО-ны біржақты қозғалыс сияқты көретінмін — біз оларды қорғаймыз, ал олар біз үшін ештеңе істемейді, әсіресе қиын сәтте», — деп жазды ол.
Трамп сондай-ақ АҚШ пен Израиль Иранның армиясын, флотын және әскери-әуе күштерін жойып, «барлық деңгейдегі дерлік» ирандық жетекшілерді өлтіргенін тағы да қайталады. Осыған байланысты, оның айтуынша, АҚШ-қа НАТО елдерінің көмегі енді қажет емес.
«БІЗ ЕШҚАШАН МҰҚТАЖ БОЛҒАН ЕМЕСПІЗ! Бұл Жапонияға, Австралияға немесе Оңтүстік Кореяға да қатысты» — деп қосты АҚШ басшысы.
Кейінірек, Ақ үйдің Овальды кабинетінде Ирландияның премьер-министрі Михол Мартин мен кездесуі кезінде Трамп соғысқа қатысты НАТО елдерінің ұстанымын тағы да сынға алды.
«Бізге ешкімнің көмегі керек емес», — деді АҚШ президенті журналистердің бірінің сұрағына жауап бере отырып.
