Сүлгіні жуып, кептіріп қоясыз. Бірақ бет-қолыңызды сүрткенде одан қайтадан дымқыл иіс шығады. Кейде жұмсақ сүлгі бірнеше жуғаннан кейін қатайып кетеді. Мұндайда мәселе кір жуғыш ұнтақтың сапасында ғана болмауы мүмкін. Жуғыш затты артық салу, сүлгіні барабанда қалдыру және шала кептіру де әсер етеді, деп хабарлайды Malim.kz.
1. "Көбірек салсам, тазарақ болады" деп ойламаңыз
Ұнтақ немесе сұйық жуғыш затты молынан құю тазалыққа кепіл емес. Артық мөлшері толық шайылмай, сүлгінің талшықтарына жиналуы мүмкін. Соның әсерінен мата қатайып, қолға жайсыз тиеді.
Құралды көз мөлшерімен құя салмай, қаптамасындағы нұсқаулыққа қараңыз. Мөлшерін кірдің көлеміне, ластануына және судың кермектігіне қарай таңдаған дұрыс. Машинадағы қалдықтар да уақыт өте жағымсыз иіске себеп болуы мүмкін.
2. Жұмсартқыш сүлгіге әрдайым пайдалы емес
Хош иісті жұмсартқыш қосылған сүлгі жағымды сезілгенімен, суды бұрынғыдай жақсы сіңірмеуі мүмкін. Whirlpool түсіндіруінше, мұндай құрал талшықтардың бетінде қабат қалдырып, сүлгінің ылғалды сіңіру қабілетін төмендетеді.
Сондықтан сүлгі жуған кезде жұмсартқышты қоспай көріңіз. Әсіресе бет-қолыңызды сүрткенде су теріңізде қалып қоятын болса, осы әдетке назар аударған жөн.
3. Машина тоқтаған соң сүлгіні бірден алыңыз
Кешке кір салып, таңертең жаю ыңғайлы көрінуі мүмкін. Алайда дымқыл сүлгі жабық барабанда ұзақ жатса, жағымсыз иіс пайда болуы ықтимал. Ондай иіс кептіргеннен кейін де қалуы мүмкін.
Кір жууды үйде болатын уақытқа жоспарлаңыз. Бағдарлама аяқталған соң сүлгіні алып, жайып жіберіңіз. Егер ол барабанда жатып, иістеніп үлгерсе, қайта жуып, дереу кептірген дұрыс.
4. Барабанға сүлгіні нығыздап тықпаңыз
Сүлгі су сіңіргенде ауырлайды. Машинаға шамадан тыс салынса, еркін қозғалып, дұрыс жуылуына кедергі болады.
Бір жуғаннан бәрін бітіремін деп барабанды толтыра бермеңіз. Машина нұсқаулығында таңдаған бағдарламаға көрсетілген жүк мөлшерін сақтаңыз. Сүлгілерді бос орналастыру олардың жақсы жуылуына көмектеседі.
5. Температураны заттаңбасына қарап таңдаңыз
Барлық сүлгіні бірдей ыстық суда жуа беруге болмайды. Матасы, түсі, жиегіндегі сәндік бөлшектері әртүрлі болуы мүмкін.
Алдымен сүлгіге тігілген күтім белгісін қараңыз. Онда рұқсат етілген температура мен кептіру тәсілі көрсетіледі. Ақ және түрлі түсті сүлгілерді бөлек жуу да бояудың жұғуынан сақтайды.
6. Шала кепкен сүлгіні шкафқа салмаңыз
Сүлгінің сыртқы беті құрғақ болғанымен, қалың тұстары дымқыл қалуы мүмкін. Оны бүктеп, шкафқа салып қойсаңыз, қалған ылғал жағымсыз иіске себеп болады.
Сақтауға жинамас бұрын толық кепкенін тексеріңіз. Ал кептіргіш машина қолдансаңыз, сүлгі құрғағаннан кейін артық ұстамаңыз: шамадан тыс кептіру де матаны қатайтуы мүмкін.
Иіс сүлгіден емес, машинаның өзінен шығуы мүмкін
Кір жуғыш машинаның есік резеңкесінде, жуғыш зат салатын науасында және ішінде ылғал мен құрал қалдықтары жиналады. Сондықтан сүлгіні қайта-қайта жуа бермей, машинаның өзін де тексеріңіз.
Bosch кірді алғаннан кейін есік резеңкесін құрғатып сүртіп, барабан мен жуғыш зат науасының кебуіне мүмкіндік беруді ұсынады. Машинаны тазалағанда өз моделіңіздің нұсқаулығын басшылыққа алыңыз.
Сүлгіні жаңасына ауыстыруға асықпай, алдымен қалай жуып, қалай кептіретініңізге қараңыз. Кейде артық құйылған жуғыш заттан бас тартып, кірді уақытында жаюдың өзі күнделікті қолайсыздықты азайтады.
