Несіпбек Айтұлы енді Берік Уәлиге өлең арнады

  • 09.04.2020
  • Malim Админ

Мемлекеттік сыйлықтың иегері Несіпбек АЙТҰЛЫ президент Қасым-Жомарт ТОҚАЕВТЫҢ баспасөз хатшысы Берік УӘЛИГЕ өлең арнады. Ақын жыры әлеуметтік желіде тарап кетті.

Ақын қазақ поэзиясына 1974 жылы «Қозыкөш» атты жыр жинағымен келген. Әр жылдары «Балдырған», «Жалын», «Жұлдыз», «Қазақ әдебиеті» сынды басылымдарда еңбек еткен. Мұқағали МАҚАТАЕВ және Жамбыл атындағы сыйлықтардың лауреаты. «Парасат» орденінің иегері.

Атам жүр түсіме еніп

(Берік Уәлиге)

Айналған өз тұсында аты аңызға,

Құс салған екеуміздің атамыз да.

Шын болса атамыздың аңшы екені,

Кеміріп ақ қағазды жатамыз ба?

 

Бар ма екен аталардан қымбат адам,

Көктедік солар берген мың батадан.

Қондырып қолға қыран көрмесек те,

Шошайып шықпаймыз ба қырға таман?

 

Мінбеген жан емеспіз атқа бұрын,

Көшеде жүреміз бе таптауырын?

Бүркіті түлкі бүрген атаң құсап,

Сен бе бір бұрқыратып шап, бауырым!

 

Армансыз атамыздай күн кешірмей,

Өмірден өтеміз бе бір көсілмей?

Томаға киген қыран түк көрмейді,

Көрінер қараңғылық түрмесіндей.

 

Тіршілік кейде жолды қиындатып,

Батамын мен де мұңға миым қатып.

Сол кезде бір жүйрікке қарғып мініп,

Жапанға кетсем деймін құйындатып.

 

Амал жоқ, кейін туып, кеш түледік,

Шаңқылын қырандардың естімедік.

Атаның бүркітіне жем бермедік,

Тұғырда сілкінетін төсті керіп.

 

Саятта бір-біріне болған сыңар,

Таулардан көрінбейді енді аңшылар.

Ақиық аталардың бойындағы,

Қасиет қанымызда қалған шығар.

 

Қыраны қия беттен түскен іліп,

Біздерге қайда бүгін құсбегілік?

Қайтайық Тарбағатай жаққа барып,

Атам жүр маза бермей, түске кіріп.

Байланысты жаналықтар

Берік Уәлидің «өтірігі», Тоқаевтың үндеуі және Назарбаевтың тапсырмасы

27.04.2020

"Ханституция" vs Конституция: Жапаров Ақаев пен Бакиевтің ізін жалғай ма?

13.04.2021

Қазақ-түрік аспанын қайтадан ашу үшін

08.08.2020

Қызыл ту ұстап шыққандар сотталады

12.05.2021

Ішімдік ішкен прокурор, өз-өзін атқан полицей: Әбдіханов неге үнсіз?

30.05.2021

Шенеуніктер неге жұлдыз кеңесшілерге құмар?

04.06.2020