Мемлекеттік хатшы Энтони Блинкеннің мәлімдемесінде, құқық қорғаушыларды қамау мәселесінен бөлек, Әзірбайжандағы азаматтық қоғам мен бұқаралық ақпарат құралдарына қысымның күшеюіне де алаңдаушылық білдірілді.
АҚШ Әзірбайжан үкіметін Руфат Сафаровты, Севиндж Вагифгизиді, Азер Гасимлиді, Фарид Мехрализаданы, Бахтияр Гаджиевті, Губад Ибадоғлуды, жақында ұсталған Meydan TV тәуелсіз телеарнасының қызметкерлерін және адам құқығын қорғағаны үшін қамауға алынған басқа да көптеген азаматтарды дереу босатуға шақырды.
Руфат Сафаров – «Қорғау сызығы» қоғамдық ұйымының құрылтайшыларының бірі. Бұл ұйым саяси тұтқындаулар мен қудалаулар, үкіметтегі жемқорлық және азаптаулар туралы айыптауларды құжаттаумен айналысады. Әзірбайжан билігі Сафаровты АҚШ-қа Мемлекеттік хатшының адам құқықтары жөніндегі сыйлығын алу үшін барар алдында, 3 желтоқсанда ұстады.
«Abzas Media» бас редакторы Севиндж Вагифгизи мен оның командасы мемлекеттік шенеуніктердің бақылауындағы компаниялар өткізген заңсыз тендерлер туралы баяндап, мемлекет қаржысын ірі көлемде жымқыру фактілерін әшкерелеген.
Оның жұмысы биліктің ашуын тудырып, 2023 жылдың қарашасынан бері тергеу изоляторында отыр. 9 желтоқсанда Вагифгизи ханым Мемлекеттік хатшының қолынан 2024 жылғы Сыбайлас жемқорлыққа қарсы күрес чемпионы сыйлығын сырттай алды.
«Біз Әзірбайжан үкіметін адам құқығын қорғағаны үшін әділетсіз ұсталғандарды босатуға, азаматтық қоғамға қарсы репрессияны тоқтатуға, барлық адамдардың адам құқықтары мен негізгі бостандықтарын құрметтеуге және Еуропадағы ынтымақтастық және Қауіпсіздік ұйымына кіру кезінде алған міндеттемелерін орындауға шақырамыз», - деді Блинкин.
Фото: usembassy.gov
