Байден Израиль мен Ливандағы «Хезболланың» бітімге келгенін айтты
Байденнің әкімшілігі енді Газадағы қақтығысты тоқтату үшін бәрін жасамақ. Бұл туралы «Америка дауысы» жазды.
Джо Байденнің сөзінше, Израиль мен Ливандағы «Хезболла» арасындағы бітім сәрсенбі күні күшіне енеді.
«Өткен жылы Газадағы соғыс басталғаннан бері мыңдаған адамның өмірін қиған қақтығысты тоқтатуға осы келісім жол ашады, деді Байден.
Израильдің Қауіпсіздік кеңесі келісімді 10-1 дауыспен мақұлдағаннан кейін көп ұзамай Ақ үйде сөйлеген Байден Израиль премьер-министрі Биньямин Нетаньяху мен Ливан премьер-министрі Наджиб Микати арасындағы келіссөздер туралы хабарлады.
«Бұл соғыс қимылдарын біржолата тоқтату керек, – деді Байден. – Хезболла мен басқа да лаңкестік ұйымдардың қалдықтары бұдан былай Израильдің қауіпсіздігіне қатер төндірмейді».
Израиль 60 күн ішінде өз күштерін біртіндеп шығарады, ал Ливан армиясы Хезболланың аймақтағы инфрақұрылымын қалпына келтіре алмайтындығына кепілдік беру үшін Израильмен шекаралас аумақты бақылауға алады.
«Екі жақтың бейбіт тұрғындары жақын арада өз қауымдастықтарына аман-есен орала алады», – деді ол.
Джо Байден өзінің әкімшілігі Газадағы атысты тоқтатуды талап етіп жатқанын және Сауд Арабиясы мен Израильдің қарым-қатынасын қалыпқа келтіруі мүмкін екенін мәлімдеді.
Associated Press агенттігінің хабарлауынша, Израиль мен Хезболла арасындағы бітім жарияланғаннан кейін мыңдаған адам Ливанның оңтүстігіне үйлеріне оралу үшін ағылған. Бейрутты оңтүстік аудандармен байланыстыратын тас жолда көлік кептелісі болған.
Фото: «Орда» сайты
Самое читаемое
