«Дұрыс емес ақпаратты тарату». Қырғызстан президенті «Азаттық» радиосын жабу ұсынысын құптады
Жапаров «Азаттықтың» дәурені біткенін айтты
Қырғызстан президенті Садыр Жапаров Илон Маск ұсынған АҚШ мемлекеттік департаментінің медиа жобаларын жабу жоспарын қолдады, деп хабарлайды Malim.kz.
Маск АҚШ президенті әкімшілігінің өкілі ретінде үкімет қаржыландыратын «Америка дауысы» және «Азаттық радиосы» медиа жобаларын жабуды ұсынды. Ал Қырғызстан билігі «Азаттық радиосының» Қырғызстандағы филиалының қызметін бірнеше рет тоқтатуға тырысқан екен.
Қырғызстан басшысы Садыр Жапаров халықтың өзі-ақ БАҚ-та өтірік пен шындықты ажырата алатынын, ал «Азаттықтың» дәурені біткенін айтты.
Дұрыс емес ақпаратты тарату немесе жаңалықтарды манипуляциялау сөз бостандығына жата ма? Рұқсат етуді сөз бостандығымен немесе адам құқықтарымен шатастырудың қажеті жоқ. Сондықтан Трамп пен Масктың шешімдерін қолдаймын», - деді Жапаров.
Айта кетейік, 2023 жылдың 23 қаңтарда Қырғызстан билігі Азаттық радиосының үстінен сотқа арыз түсірген. Шағымда Азаттық радиосы қырғыз-тәжік шекарасындағы қақтығыс туралы видеоматериалды жоймағаны жазылған. Бұл айыппен Азаттықтың қырғыз қызметі де, медиа ұйымдар мен тәуелсіз журналистер де келіспеген еді.
Фото: stat.gov.kg
