Ирандағы президент сайлауының екінші турында Масуд Пезешкиан жеңіске жетті, деп хабарлайды Malim.kz.
Президент сайлауының екінші кезеңінде Масуд Пезешкиан 53,3% дауыс жинаған. Ал оның консервативті қарсыласы Саид Джалили 44,3% алған.
Айта кетейік, Иранның бұрынғы президенті Ибрахим Раиси мамыр айында тікұшақ апатынан қайтыс болғаннан кейін елде президент сайлауы өтетіні жарияланған еді.
Сайлаудың бірінші туры 28 маусымда өтіп, онда ешбір кандидат көпшілік дауысқа ие бола алмады.
Ал бұрын кардиохирург болған Масуд Пезешкиан сайлау науқаны кезінде Ирактың моральдық полициясын сынға алды. Ол Иранның әлемнің басқа елдерінен «оқшаулануын» тоқтатуға уәде берді. Сонымен қатар, Пезешкиан Батыспен 2015 жылғы ядролық келісімді қайта бастау туралы «сындарлы келіссөз» жүргізуге шақырды. Сол арқылы Иранға батыс санкцияларды жеңілдету үшін елдің ядролық бағдарламасын шектеуге келісуді көздейді.
Фото: iz.ru
