Ресей Украинаға 580 дрон және 40 зымыранмен шабуыл жасады
Украина президенті Владимир Зеленскийдің айтуынша, Ресей Қарулы күштерінің Днепр, Днепр облысы және басқа өңірлерге жасаған түнгі шабуылы салдарынан үш адам қаза тауып, ондаған адам жараланған, деп хабарлайды Malim.kz DW-ге сілтеме жасап.
20 қыркүйекке қараған түні Ресей Қарулы күштері Украинаға жаппай шабуыл жасады. Шабуыл барысында 40 қанатты және баллистикалық зымыран, сондай-ақ шамамен 580 түрлі дрон қолданылды. Бұл туралы Украина президенті Владимир Зеленский Telegram-да хабарлады.
Оның айтуынша, соққы Днепр қаласына, Днепр, Николаев, Чернигов, Запорож облыстарына, сондай-ақ Полтава, Киев, Одесса, Сумы және Харьков облыстарының бірқатар қауымдарына бағытталған.
«Днепрде кассеталық оқ-дәрімен жабдықталған зымыранның көпқабатты үйге тура соққы жасағаны тіркелді», – деді ол.
Шабуылдан ондаған адамның жараланғаны, үш адамның қаза тапқаны белгілі болды.
«Украина өзін де, Еуропаны да қорғай алатынын дәлелдеді. Бірақ сенімді қорған үшін біз бірігіп әрекет етуіміз керек: әуе қорғанысын күшейту, қару жеткізілімін арттыру, Ресейдің әскери машинасына және оны қаржыландыратын салаларға қарсы санкцияларды кеңейту қажет», – деп атап өтті Зеленский.
Фото: State Emergency Service of Ukraine/REUTERS
