Түркияның Болу провинциясындағы тау шаңғысы курортында шыққан өрттен 76 адам қаза тапты, деп хабарлайды Malim.kz.
Hürriyet Daily News басылымының мәліметінше, елдің Ішкі істер министрі Әли Ерлықайдың айтуынша, төтенше жағдай бойынша тергеу аясында 9 адам, оның ішінде қонақүй иесі де ұсталған. Министрдің сөзінше, 45 қаза тапқан азаматтың денесі отбасыларына тапсырылған. Қалғандарының жеке басын тану сот-медициналық сараптама мен ДНҚ тестілері арқылы анықталмақ.
Өрт Карталкая курортында өткен түнде шыққан. Көптеген қонақтар құтқарылу үшін төсек-орын жіптері арқылы түсуге тырысқан, кейбіреулері терезеден секіріп кеткен. 51 адамның зардап шеккені хабарланған.
Сондай-ақ, шетелдік БАҚ өкілдері 1974 жылы салынған қонақүйдің ағашпен қапталғанын, бұл өрттің тез таралуына себеп болғанын жазып жатыр.
Қонақүйде барлығы 237 адам болған. Өрттің шығу себебі әлі анықталмаған.
Фото: X/The Risk Intelligence Group
