Зеленский Трамп пен Путиннің кездесуіне қатысуға дайын
Украина президенті Владимир Зеленский NBC News арнасына берген сұхбатында Дональд Трамп пен Владимир Путиннің Будапештте өтеді деп жоспарланған кездесуіне қосылуға дайын екенін айтты, деп хабарлайды Malim.kz DW-ге сілтеме жасап.
«Мен дайынмын. Мен мұны АҚШ президентіне Ақ үйдегі кездесу кезінде де айттым. Мен дайынмын», – деді Зеленский 19 қазанда NBC News журналисінің сұрағына жауап бере отырып.
Мемлекет басшысы әділ әрі ұзақ мерзімді бейбітшілік орнату үшін екі тараптың қатысуы қажет екенін атап өтті.
«Бізсіз қандай да бір келісім болуы мүмкін емес», – деді ол.
Ал «соғысты тоқтату үшін Украина аумағының бір бөлігін беруге дайын ба?» деген сұраққа Зеленский:
«Егер біз бұл соғысты тоқтатып, бейбіт келіссөздерге шұғыл және дипломатиялық жолмен көшкіміз келсе, онда біз бар жерімізде қалуымыз керек. Путинге қосымша ештеңе берудің қажеті жоқ», – деп жауап берді.
Сондай-ақ Зеленский қазіргі уақытта Украина «соғыста жеңіліп жатқан жоқ, бірақ Ресей де жеңіске жете алмай отыр» деді. Оның пікірінше, дәл осы себепті Мәскеу майдандағы әлсіз позициясын сезініп, бейбіт тұрғындарға әуеден соққы беруді күшейткен.
«Сол үшін Путин қазір әуежағдайдағы шабуылдарды арттырып жатыр, ол биылғы қыста Украинада энергетикалық дағдарыс туғызғысы келеді», – деді Зеленский.
Фото: Ed Ram/Getty Images
