Алматы мен Астанада жасанды интеллект арқылы бет-әлпетті танитын камералар қолданыла бастады.
Ұлттық бейнемониторинг жүйесі жасанды интеллект технологияларын іздеуде жүрген адамдарды тануға, қоғамдық орындарда қалдырылған заттар туралы сигнал беруге, құқық бұзушылықтарды автоматты режимде тіркеуге мүмкіндік береді. Сондай-ақ компьютерлік бағдарлама көлікті маркасы, моделі және түсіне қарап анықтайды.
"Ақылды" камералар теміржол вокзалдары, әуежайлар, қонақ үйлер, көшелер және сауда ойын-сауық орталықтарына орнатылған. Жүйе тиімділігін көрсетті. Дүниежүзілік көшпенділер ойындарын өткізу кезінде елорданың қоғамдық орындарында жоғалған балаларды, сондай-ақ есепте тұрғандар мен хабар-ошарсыз кеткен адамдарды жедел табуға мүмкіндік туды. Бейне-талдау жүйесінің көмегімен Астанада іздеуде жүрген 46 құқық бұзушы жедел түрде анықталып ұсталды. Осыған ұқсас жұмыс Алматыда жүргізіліп жатыр. Онда осындай 30 адам анықталып ұсталды", – делінген хабарламада.
Мұндай жүйелер Қытайда, Ресейде және Еуропа елдерінде кеңінен қолданылады.
Қазақстан үздік тәжірибелерді игеріп келеді. Алдағы уақытта камералар санын көбейтіп, бейнемониторингті кеңейту жоспарланып отыр. Бұл жұмыстар кезең-кезеңімен жүргізілетін болады.
Айта кетейік, бүгінгі таңда меншік түріне қарамастан елімізде 1 миллион 359 мың бейнекамера бар, оның 310 мыңы жедел басқару орталықтары және полицияның кезекші бөлімдеріне шығарылған.
Фото: ІІМ
