Астанада биологиядан IBO-2024 халықаралық олимпиадасы басталады
Оған әлемнің әр қиырынан 305 биолог қатысады
Бүгін Астанада IBO-2024 биологиядан 35-халықаралық олимпиада басталады. Олимпиада апта бойы жалғасады, деп хабарлайды Malim.kz.
Ұйымдастырушылардың мәліметінше, бұл оқушылар арасындағы ең беделді олимпиадалардың бірі. Биыл оған әлемнің әр түкпірінен ең мықты 305 жас биолог қатысады. Сонымен бірге, 81 елден 275 ғалым жиналады. Еліміздің құрама командасына төрт оқушы кірген. Олар: Ғалымжан Бақтыбай, Амина Тынырбай, Нұртөре Төреханұлы, Диас Сүлейменов.
Олимпиада биохимия, молекулалық биология, биоинформатика және жануарлар анатомиясы мен физиологиясы бойынша теориялық және төрт практикалық турларды қамтиды. Олимпиаданың барлық тапсырмаларын Қазақстанның жас биологтары әзірлеген.
Жалпы, «Биологиядан Халықаралық олимпиада» әлемдегі ең үздік 7 пәндік олимпиаданың бірі. Қазақстан оқушылары 28 жыл бойы оның тұрақты қатысушысы болып келеді. Осы жылдар ішінде олар әр түрлі номинациядағы 70-тен астам марапатқа ие болған: 2 алтын, 20 күміс, 54 қола медаль. Осы көрсеткішті ескере отырып, Халықаралық ұйымдастыру комитеті олимпиаданы биыл Астанада өткізу туралы шешім қабылдаған.
Фото: ibo-info.org
