6 ай қалды: Қожаны сомдаған Нұрлан Сегізбаевтың қандай ауруға шалдыққаны белгілі болды

"Менің атым Қожа" фильмінің басты кейіпкері ауыр дертке шалдыққан, - деп хабарлайды Malim.kz тілшісі.

Бұл туралы журналист Жанар Канафина мәлімдеді. Оның айтуынша, Нұрлан Сегізбаев сырқатына байланысты жұмысынан айырылған. Журналист Сегізбаевпен түскен суретін жариялады. Оның айтуынша, актер өкпе ауруына шалдыққан. 

"Бала күніміздің батыры – Қожа. "Менің атым Қожа" фильміндегі басты рөлді сомдаған Нұрлан Сегізбаев (Санжар) ауыр науқасқа шалдықты. Ол – ХОӨА-ның 4-дәрежесінде. Дәрігерлер небәрі алты ай өмір сүреді дейді. Қазір Нұрлан Санжарұлына шұғыл қаржылай көмек қажет. Ем-домына және соңғы жоспарларын аяқтауына қаражат керек. Кезінде ұстаз болған, бірақ қазір сырқатына байланысты жұмыс істей алмайды. Оның үстіне, 75 жастағы адамның күніне 14 сағат тыныс алу аппаратына қосылып отыруы – өз алдына бір сынақ", - деп жазды ол. 

Нұрлан Санжарұлы Сегізбаев 1951 жылғы 28 қаңтарда дүниеге келген. Ол – кеңестік және қазақ киноактері, сценарист, кинодраматург. Қазақстанның еңбек сіңірген қайраткері, философия ғылымдарының кандидаты. Қазақстан кинематографистер одағының мүшесі.

Tengrinews.kz тілшісі Нұрлан Сегізбаевпен байланысып, ол созылмалы өкпе ауруына (ХОӨА) шалдыққанын растады. Қазір ол тәулігіне 14 сағат оттегі концентраторы арқылы тыныс алуға мәжбүр.

"Халықтан қаржылай көмек жинағым келмейді. Билікке де, кәсіпкерлерге де жүгіндім – кейбірі аздап көмектесті. Жағдайым онша емес. ХОӨА-ның 4-стадиясы. Бұл ауру астмаға ұқсайды, адам дем жетпей тұншығады. Дәрігерлердің болжамы – алты ай. 10-ы Астанаға, өкпе ауруларына арналған діңгек жасушалар жөнінде консультацияға баруым керек. Бұл да арзан ем емес. Маған квота беріледі деп уәде берді, соған үміттеніп отырмын", – деді Нұрлан Санжарұлы Tengrinews.kz тілшісіне.

Жағдайды қиындататыны – Сегізбаевтың жұбайы да жуырда екі отадан өткен, ал кіші ұлы аутизмге шалдыққан.

Көп жыл бойы Нұрлан Сегізбаев әл-Фараби атындағы ҚазҰУ-дың журналистика факультетінде дәріс оқыған. Драматургия мен телевизия туралы бірнеше кітап жазған. Сонымен қатар, ол "Бату-хан" және "Күтпеген қонақ – Жошы" атты тарихи романдардың авторы. Бұл шығармаларда ол Нұрлан Санжар есімімен жарияланған.

Қазір отбасы 131 мың теңге көлеміндегі зейнетақымен күн көріп отыр. "Менің атым Қожа" балалар көркем фильмі Бердібек Соқпақбаевтың аттас повесінің желісімен 1963 жылы режиссер Абдолла Қарсақбаевтың жетекшілігімен түсірілген. Фильмнің музыкасын Нұрғиса Тілендиев жазған. Кейін Нұрлан Сегізбаевтың өзі еске алғандай, ол бұл фильмге кездейсоқ түскен. Түсірілім тобы басты рөлге бала таба алмай жүрген. Оператор Михаил Аранышев пен Тұрар Дүйсебаев түскі ас кезінде төбелесіп жатқан балаларды көріп қалады. Солардың бірі – Сегізбаев болған.

"Мені ұстап алып, бір жаққа алып кетті. Милицияға апара жатыр деп ойладым. Олар мені киностудияға алып келді. Бұл – қазіргі Жамбыл атындағы мемлекеттік филармонияның ғимараты, бұрынғы киностудия. Қазір мұнда бәрі жаңа. Абдолла Қарсақбаев мені көзі көгеріп, жыртылған жейде киіп тұрғанымды көргенде, жай тыныс алды. Репетициялар басталды. Мен бақытты болдым, өйткені мектепке барудың қажеті жоқ еді", – деп еске алған Сегізбаев.

Актер Қожа рөлін сомдауды ешқашан армандамағанын да айтқан, өйткені "бұл жұмыстың қаншалықты ауыр екенін" түсінген. Бала кезінен жазушы болуды армандаған екен.

Фото: stan.kz