«Бір нәрсені есіңде ұста!». Бекболат Тілеухан Мағауиннің аманатына адал болды ма?

Жазушы Мұхтар Мағауин жайында естеліктер айтылып, әр түрлі пікір жазылып жатыр. Ғалым түгендеген жыраулар жырын әуенге түсіріп, елге жеткізген Бекболат Тілеухан да қаламгер туралы жазба жариялады деп хабарлайды Malim.kz. 

«Мағауин болмаса біз жоқпыз!» деп аталатын жазбасында Бекболат Тілеухан күрес жазушы өмірінің мәніне айналғанын айтады.  Берері жойқын, безері де жетерлік екенін еске салады. Жойдасыз қабілет иесі деп бағалайды.

Қияндағы қыстауды” менің буынымдағы кітапқа жақын қазақтың оқымағаны кемде кем. “Тазының өліміне” тәнті боп жүргенде Мағауиннің қадірін Ерік Асқаров, Таласбек Әсемқұлов, Тұрсынжан Шапай, Ғалым Доскендердің тамсануымен таныдым. Одан соң “Бес ғасыр жырлайды” мүлдем есімізді алды. Бір анық жәйт — Мағауин болмаса біз жоқпыз. Әнші емес, жыршы ретімді айтам. Күйді жырға телудің жалғасуы, қобызбен жырлау, қалыс бұрау, тамырлас елдердің дәстүрлі мұрасына үңілу бәрі-бәріне себеп боп қамшылаған Мұхтар Мағауин еді,-дейді жазба авторы.   

Бекболат Тілеухан Мағауинмен тұңғыш сапарлас болған кезін еске алған.  Шет ауданының 60 жылдығында өнер көрсеткен әнші сол кезде  жазушының өзін қалай бағалағанын жазады.  Оған аманат сөзін, ақыл-кеңесін де нықтап тұрып жеткізген.     

 ...Сахнаға шығатын кезегім келді. Тілеуімді ел де, өзім де тілеп жүрген шақ. Әнге сусап отырған ауылым айрықша қабылдады. Терге шомып отырып екі әннің орнына 7-8 ән кетті. Қошамет. Овация. Қосшы баласының өнеріне риза боп Мұхтар ағам да құттықтады...    

...Айтқаны: “Әй, бала! Әншілігің әжептәуір екен. Әмбе зердесіз де емессің. Политехта оқыпсың. Зеректігің де болса керек. Қысқасы, талантты баласың! Бірақ, бір нәрсені есіңде ұста. Сен осындай дарынды болғаның үшін сіңірген зәредей еңбегің, титтей үлесің , жасаған жұмысың жоқ. Солай тудың. Алла солай жаратты. Болды. Енді осы құдайдың бергенін еселеп елге қайтармасаң құдай төбеңнен ұрады. Ішіп кетесің бе, берекең жоғала ма. Оңбайсың!”

Қамқорсығаныңыз ба, ұрысқаныңыз ба, мазағыңыз ба дегендей жасқана қарағанымда “ана ағаң құсап үкіңді желпілдетіп қыз қуып қызық қуып арақ ішіп, ана ағаң құсап әлділерді жағалап ән салып жүрме. Дауысың қарлыққан күні қараңды батырасың. Қыруар қазына бар қазақтың қолына жетпеген. Жеткіз! Тап сен жеткізе аласың,- дейді Б.Тілеухан.  

Бекболат жазбасында Мағауиннің тілекші болғанын, үйлену тойын ашып бергенін, “Дарын” мемлекеттік жастар сыйлығына “Жұлдыздан” ұсынғанын айтады.  Сөз соңында жазушының өз елінде жерленгені дұрыс еді деген ойын да жасырып қалмаған.  «Қалаулысын қимай қабырғасы қайысқан жұрт Алатаудың баурайына сыймай Кеңсайға қарай шеру тартып бара жатса деген арман сығалайды. Бұл жолы тағы “Мағауинше” қиыс тартты. Жердің бәрі Алланыкы. Алладан келгенбіз, Аллаға қайтушымыз!,- дейді ол.  

Фото: видеодан скриншот