Атыраулық дәрігерлер пышақ қолданбай ота жасады
Бұған дейін өңірде дәл мұндай емдеу тәсілі қолға алынбаған
Атырау облысының Құлсары қаласында дәрігерлер алғаш рет лапароскопиялық тәсілмен ота жасады. Жылыой аудандық орталық ауруханасының бас дәрігері Асулан Абдрахмановтың айтуынша, бұрын дәл мұндай емдеу тәсілі қолға алынбаған.
«Бұрын аппендицит, асқазан жарасынан қан кету, кіндік және шап жарығына операциялар кесу әдісімен шұғыл әрі жоспарлы түрде жасалған еді. Енді лапароскопиялық ота жасау ісі қолға алынды. Бүгін 36 жастағы азаматқа заман талабына сай лапароскопиялық әдіспен ота жасалды», - дейді Асулан Абдрахманов.
Оның пікірінше, лапароскопиялық хирургия – науқастың ішкі ағзасына операцияны тілік жасамай-ақ орындайтын тың әдіс. Бұл тәсілмен ота жасалған емделушінің аяққа тұру мүмкіндігі жоғары болады.
«Науқас «Теңіз» кен орнынан аудандық аурухананың қабылдау бөліміне ішінің және оң жақ мықын тұсының ауырсынуы белгілерімен жеткізілді. Оның жағдайына медициналық тексеру жүргізілді. Лабораториялық зерттеу нәтижесінен кейін азаматқа аппендицит диагнозы қойылды. Науқасқа өзінің келісімімен лапароскопиялық әдіспен шұғыл түрде ота жасалды», - деп хабарлады Асулан Абдрахманов.
Аудан дәрігерлерінің айтуынша, науқастың жағдайы бірқалыпты. Ол аурухананың хирургия бөлімінде ем алып жатыр.
Фото: matritca.kz
