Мұнай бағасы құлдырап жатыр
Әлемдік нарықтағы мұнай бағасы күрт төмендеп жатыр. Бұл АҚШ президенті Дональд Трамптың 185 елден импортталатын тауарларға жаңа кедендік баж салығын енгізу туралы шешіміне байланысты
Әлемдік нарықтағы мұнай бағасы күрт төмендеп жатыр. Бұл АҚШ президенті Дональд Трамптың 185 елден импортталатын тауарларға жаңа кедендік баж салығын енгізу туралы шешіміне байланысты, - деп хабарлайды Malim.kz тілшісі.
2025 жылғы маусымға арналған Brent маркалы мұнай фьючерстерінің бағасы Лондондағы ICE биржасында 7,08 пайызға төмендеп, Астана уақытымен 08:25-те бір баррель үшін 69,64 доллар болды.
Ал WTI маркалы мұнайдың мамырға арналған фьючерстері 7,36 пайызға құлдырап, бір баррель үшін 66,43 долларға дейін түсті.
Еске салайық, «қара алтынның» бағасы АҚШ президенті Дональд Трамптың 185 елден келетін тауарларға жоғары кедендік тариф енгізуінен кейін төмендей бастады.
Қазақстан да АҚШ енгізген жаңа тарифтерге іліккен елдердің қатарына кірді. Біздің ел үшін белгіленген тариф мөлшері – 27 пайыз. Бұл шешімге қатысты ҚР Сауда және интеграция министрлігі пікір білдіріп, сарапшылар өз көзқарастарын айтты.
Сонымен қатар, ОПЕК+ ұйымына мүше сегіз ел биылғы мамырдан бастап мұнай өндіру көлемін тәулігіне 411 мың баррельге арттыратынын мәлімдеді.
Фото: pixabay.com
