Павлодарда сегіз ай ішінде 32 экономикалық заң бұзушылық тіркелген

Өңірде жыл басынан бері экономикалық заңбұзушылық бойынша 32 іс тіркелген. Қазіргі күні оның 12-сі сотқа жіберілген. Келтірілген залал сомасы – 1,2 млрд теңге.

Kazinform.kz жазуынша, Павлодар облысы бойынша экономикалық тергеп-тексеру департаменті 2023 жылы 15 істі тергеген. Оның 12-сі сотқа жіберілген. Нәтижесінде мемлекетке 348 млн теңге залал келгені анықталып, 14 адам сотталған. Ал, жыл басынан сотқа дейінгі 32 тергеу тіркеліп, оның 12-сі сотқа жіберілді.

Департаменттің екінші жедел басқармасы басшысының орынбасары Николай Пахомовтың айтуынша, ҚР Қылмыстық Кодексінің 189-бабы бойынша 15 қылмыстық іс тіркеліп, оның 14-і сотқа жолданған. Мемлекетке келтірілген залалдың жалпы сомасы 1,2 млрд теңгені құрады (8 адам сотталды).

– Мәселен, департаментпен «Қазақстан Темір Жолы» ҰК» АҚ «Солтүстік» өңірлік филиалы Павлодар учаскесі бастығының заңсыз қызметі әшкереленді. Ол өзінің лауазымдық жағдайын жүйелі негізде пайдалана отырып, қызмет бойынша жалпы қамқорлығы үшін заңсыз ақшалай сыйақы алған. Сот азаматтың бас бостандығын 3,6 жылға шектеді. Ал «Павлодар қаласының балалар-жастар спорт орталығы» мекемесінде алдын ала сөз байласу бойынша бір топ адам еңбекақыны және өзге де төлемдерді заңсыз аудару жолымен жалпы сомасы 15 млн теңгеден астам бюджет қаражатын ұрлағаны анықталған, - дейді Николай Пахомов.

Бұған қоса «Богатырь-Көмір» ЖШС-де 2020-2022 жылдар аралығында жүйелі негізде ақша қаражатын ұрлаумен айналысып келе жатқандардың істері әшкере болды. Олар техникалардың ескі қосалқы бөлшектерін жаңа деп көрсетіп, кәсіпорынға әкеліп отырған. Кәсіпорынға келтірілген залал – 120 млн теңге. Кінәлі тұлғалар ұсталып, 6 жыл мерзімге бас бостандығын шектеу түріндегі жаза тағайындалды. 

Фото: Павлодар облысы Өңірлік коммуникациялар қызметі