Шымкент қаласындағы «ВИЗиТ» ЖШС өндіретін алкогольсыз «Буратино», «Дюшес», «Тархун», «Лимонад» табиғи сусындарын білмейтін адам жоқ қаір. Бұл кәсіпорын өнімдерін «Денсаулық» сериясын қолдану арқылы дәрілік шөптер мен тамырлардың инфузиясы қосылған табиғи шикізаттан әзірлейді.
Аталмыш кәсіпорын бұл сапаға жету үшін аз ізденген жоқ. Сонау 1930 жылдан бастау алатын өндіріс орны 1991-1998 жылдары «Pepsi-Cola», «Coca-Cola» компаниялармен жұмыс істеп, өндірісін жетілдіре түскен. Одан беріде де техникалық жағынан жетілуді тоқтатпаған кәсіпорын 2006 жылы «KRONES» автоматтандырылған құю желісі орнатып, сағатына 12,0 мың бөтелке өндіруге қол жеткізді. Мұнан бөлек, GPS спутниктік навигация жүйесі енгізіліп, ескірген жабдықтар ауыстырылды. Сусындарды дайындауда көмірқышқыл газымен қанықтырудың озық технологиялары игеріліп, өндіріс қуаттылығы 3 есеге артқан.
Бұл компанияның дамуына мемлекеттік бағдарлама да көп көмек тигізді. Мәселен, 2019 жылы айналым қаражатын толтыру үшін компания «Даму» қорына жүгініп, екінші деңгейлі банктен 14,95% несие рәсімдеп, оның 8,95% «Даму» Қоры субсидиялаған. Осындай еңбек пен қолдаудың нәтижесінде «ВИЗиТ» алкогольсіз сусындар зауыты» ЖШС-і 2019 жылы «Алтын сапа» президенттік байқауында «Қазақстанның үздік тауары» номинациясы бойынша жеңімпаз атанды.
