Ауыл шаруашылығы министрлігі республикалық өсімдіктер карантині орталығында шайн мускат жүзіміне зертханалық сараптама жүргізді.
Өсімдіктер карантині орталығы жүзімнің құрамында зиян организмдер жоқ деген шешімге келген.
"Ұлттық сараптама орталығының" Абай облысындағы Қытаймен шекарадағы филиалы жүзімнің нитрат құрамын зерттеген. Зерттеу нәтижесінде өнімдегі нитрат мөлшері келісіне 13,7 миллиграмм шыққан, бұл осы өнім үшін рұқсат етіледі.
Бұған дейін ауыл шаруашылығы министріне шайн мускат жүзімінің қауіпсіздігі туралы сұрақ қойылған болатын. Журналистердің сұрағына жауап бере отырып, министр Айдарбек Сапаров Қазақстанға импортталатын барлық өнім міндетті түрде бақылаудан өтетінін айтты. Сонымен қатар, ол өзі бұл жүзімнің дәмін көрмегенін, бірақ қосымша тексеру жүргізуді ұсынғанын жеткізді: "Тағы бір рет тексерейік", – деді министр.
Фото: dzen.ru
