Каспий құбыр консорциумы қазақстандық мұнайды қабылдау және экспорттау жұмыстарын қайта жандандырды. Қазір Новороссийск портында екі танкерге мұнай тиеліп жатыр, деп хабарлайды Malim.kz.
Энергетика министрлігінің мәліметінше, қазір теңіз терминалындағы екі айлақта SEAMAJESTY және MILOS танкерлеріне мұнай тиеліп жатыр. Екі кеме де "Теңізшевройл" ЖШС өндірген мұнайды қабылдауда.
Министрліктің мәліметінше, терминал жұмысының қайта жандануы мұнай өндіруші компанияларға шикізатты құбыр жүйесіне қайта жеткізіп, экспортты қалыпты режимде жалғастыруға мүмкіндік береді.
Энергетика министрлігі барлық операция қазіргі жағдай мен қауіпсіздік талаптарын ескере отырып жүргізілетінін атап өтті.
Энергетика министрлігі Қазақстанда мұнай өндірісінің неліктен азайғанын түсіндірдіОқыңыз
Сондай-ақ ведомство КТК басшылығымен, ірі мұнай жөнелтушілермен және басқа да қатысушылармен тұрақты байланыста екенін мәлімдеді. Министрлік жағдайды бақылауды жалғастырып, қазақстандық мұнайдың үздіксіз тасымалдануын қамтамасыз ету үшін жұмыстарды үйлестіріп отыр.
