Қостанай облысында пошташы зейнеткерлерге миллиондап несие рәсімдеген

Қостанайда зейнеткерлердің атына 2,3 млн теңге несие ресімдеген пошта тасушы ұсталды, деп хабарлайды Halyq Uni.

Polisia.kz жазуына қарағанда, Қостанай ауданында полицейлер қарт адамдарды алдап, несиелер рәсімдеген пошта тасушының алаяқтық әрекетінің жолын кескен. 

Қариялардың сеніміне кіріп, қаскүнем оңай жолмен пайда тапқысы келген. Күдікті зейнеткерлерден хатты алғанын растау үшін, сондай-ақ, зейнетақы жинақтарын алу тәртібін жеңілдету деген желеумен суретке түсу керек деп, өзінің алаяқтық схемасын іске асырып отырған. Содан кейін мобильді қосымшалардың көмегімен алаяқ жәбірленуішілердің атынан несиелер рәсімдеген. 

Оның қылмыстық әрекеттерінің нәтижесінде Қостанай ауданының 5 зейнеткері алаяқтықтың құрбаны болды. Мәселен, екі зардап шегушінің әрқайсысына 1 млн теңгеден кредит, ал қалғандарының атынан шағын несие рәсімдеген. Жалпы материалдық шығын 2,3 млн теңгеден асты, деп жазылған полиция хабарламасында.

Қазір алаяқтықтың бірнеше эпизоды бойынша қылмыстық іс қозғалған. Полицейлер сотқа дейінгі тергеу жүргізіп, істі сотқа жіберді. Мұндай қылмыс үшін заңда 3 жылдан 7 жылға дейінгі мерзімге бас бостандығын шектеу немесе мүлкі тәркіленіп, сол мерзімге бас бостандығынан айыру түріндегі жаза көзделген.