Танымал саясаттанушы Екатерина Шульманға іздеу жарияланды

Ресей Ішкі істер министрлігі саясаттанушы Екатерина Шульманға іздеу жариялады, - деп хабарлайды Malim.kz тілшісі.  

Саясаттанушы Қылмыстық кодексінің бабы бойынша қылмыстық іс аясында іздестіріліп жатыр. Бір қызығы, ол не үшін айыпталғаны айтылмаған. 

Facebook-парақшасында бұл ақпаратқа пікір білдірген Шульман Прагада екенін және бірнеше күннен кейін «Мәртебе» бағдарламасында эфирге шығатынын, кейін Софияға баратынын айтты.

Екатерина Шульман туралы не белгілі?

Екатерина Шульман — танымал саясаттанушы және публицист, заң шығару мәселелері бойынша маман, саясаттану ғылымдарының кандидаты. 2022 жылғы сәуірде Ресейдің әділет министрлігі оны «шетелдік агент» функцияларын орындайтын жеке тұлғалар тізіміне енгізді.

2022 жылы Ресейде мобилизация басталғаннан кейін Шульман Ресейден кетті. 

2023 жылы ол Қазақстандағы Maqsut Narikbayev University оқу орнына оқытушы болып орналасқан еді. Бүгін Maqsut Narikbayev University өкілдері Екатерина Шульманның оқу орнында профессор емес екені, онымен жасалған еңбек шарты 2024 жылғы 1 тамызда бұзылғанын айтты. 

Фото: facebook.com/Ekaterina.Schulmann