Непал мен Қытайдың Тибет аймағында болған алапат сел мен су тасқыны салдарынан қаза тапқандар саны артып жатыр. Непал билігінің мәліметінше, ел аумағында 270 адамның мәйіті табылған, ал 826 адам хабар-ошарсыз кеткен, деп хабарлайды Malim.kz.
Қытайлық БАҚ-тың хабарлауынша, Тибетте кемінде 3 адам қаза тауып, 558 адам із-түзсіз жоғалған. Екі елдің ресми мәліметтеріндегі хабар-ошарсыз кеткендер саны бір адамдарды қамти ма, жоқ па, әзірге белгісіз.
Апат Непалдың Тибетпен шекаралас аумағында болған. Алдын ала болжам бойынша, таудағы өзенге ірі мұз кесегінің құлауы жойқын су тасқынына себеп болуы мүмкін.
Непалдың Табиғи апаттар қаупін азайту жөніндегі ұлттық басқармасы жоғалғандардың арасында жергілікті тұрғындармен қатар қауіпсіздік күштерінің қызметкерлері мен туристер де бар екенін хабарлады. Апаттан кейін бірқатар елдің азаматтарымен байланыс үзілген.
Reuters мәліметінше, хабар-ошарсыз кеткендер арасында:
Үндістан – 177 адам;
Украина – 53 адам;
Малайзия – кемінде 55 адам;
АҚШ – кемінде 63 адам;
Австралия – 34 адам;
Ұлыбритания – 33 адам;
Канада – 25 адам;
Оңтүстік Корея – 9 адам;
Германия – кемінде 8 адам;
Сингапур – 6 адам;
Оңтүстік Африка Республикасы – 6 адам;
Жапония – 5 адам;
Ресей – 5 адам;
Жаңа Зеландия – кемінде 5 турист бар.
Оңтүстік Кореяның Сыртқы істер министрлігі хабар-ошарсыз кеткен тоғыз азаматының су электр станциясында жұмыс істегенін мәлімдеді. Тағы 10 кореялық азаматтың қиын жағдайға тап болғаны хабарланған.
Қазір апат аймағында іздеу-құтқару жұмыстары жалғасып жатыр. Жоғалған адамдардың нақты саны әлі де өзгеруі мүмкін.
