Маңғыстау облысының Бесшоқы ауылында 500 бала мектеп асханасынан тамақ ішіп, уланып қалған болатын. Жаппай уланудың себептерін анықтау бойынша жұмыстар үкіметтің жеке бақылауына алынды.
Үкіметтің баспасөз қызметінің хабарлауынша, қазір уланғандардың ішінде 460 баланың жағдайы дәрігерлердің бақылауында. 83 бала ауруханаға жатқызылған, тағы екеуі – жансақтау бөлімінде. Ауруханадағы ұл-қыздардың жағдайы тұрақты, оң динамика байқалады.
- Улану белгілерімен келген балалардың барлығына толық көлемде медициналық та, психологиялық та көмек көрсетілді. Оқиға орнында Оқу-ағарту министрлігі Балалардың құқықтарын қорғау комитетінің өкілдері жұмыс істеп жатыр. Сондай-ақ зардап шеккендер мен олардың отбасыларына қолдау көрсету үшін шаралар қабылданбақ. №8 мектепте тергеу жұмыстары жүргізіліп жатыр. Кінәлілер жауапкершілікке тартылады, - деп хабарлады баспасөз қызметі.
Сонымен қатар Үкімет басшысының тапсырмасы бойынша бір ай ішінде республикадағы барлық мектептердің асханаларында санитарлық-эпидемиологиялық талаптардың сақталуына мониторинг жүргізіледі.
Фото: ural-meridian.ru
Байланысты жаналықтар
MalimBlocks
