27 қазан әлем тарихында түрлі оқиғалармен есте қалды. Бұл күні Нью-Йоркте метро ашылып, Кариб дағдарысы кезінде әлемдегі жағдай шиеленісе түсті. Ал 1991 жылы Түрікменстан тәуелсіздігін жариялады, деп хабарлайды Malim.kz.
Тарихқа көз жүгіртіп, осы күні болған маңызды оқиғаларды еске алайық.
1904 жыл: Нью-Йоркте алғашқы метро ашылды
1904 жылғы 27 қазанда Нью-Йорк қаласында алғашқы метро желісі іске қосылды. Алғашқы пойыз Сити-холл станциясынан жолға шыққан. Оның басқару пультіне қала мэрі Джордж Макклеллан отырған.
Жаңа көлік түрі тұрғындардың қызығушылығын тудырды: алғашқы күні жерасты пойызымен 100 мыңнан астам адам жүрген.
1962 жыл: әлем ядролық соғыс қаупіне жақындады
1962 жылғы 27 қазан Кариб дағдарысының ең шиеленісті күндерінің бірі болды. Сол кезде АҚШ пен Кеңес Одағы арасындағы текетірес Кубаға кеңестік зымырандардың орналастырылуына байланысты күшейген еді.
Осы күні Куба әуе кеңістігінде АҚШ-тың U-2 барлау ұшағы атып түсіріліп, ұшқыш Рудольф Андерсон қаза тапты. Дағдарыс жағдайында екі тарап арасында келіссөздер жүріп, кейін жағдайды реттеуге мүмкіндік туды.
1991 жыл: Түрікменстан тәуелсіздігін жариялады
1991 жылғы 27 қазанда Түрікмен КСР Жоғарғы Кеңесі елдің тәуелсіздігі туралы конституциялық заң қабылдады. Оның алдында, 26 қазанда, тәуелсіздік мәселесі бойынша референдум өткен болатын.
Сөйтіп, Түрікменстан Кеңес Одағы ыдыраған кезеңде тәуелсіз мемлекет ретінде өз жолын бастады. Қазір елде Тәуелсіздік күні 27 қыркүйекте аталып өтеді.
1999 жыл: Армения парламентіне қарулы шабуыл жасалды
1999 жылғы 27 қазанда Ереванда Армения парламентінің отырысы кезінде қарулы адамдар шабуыл жасады. Шабуыл салдарынан премьер-министр Вазген Саргсян мен парламент төрағасы Карен Демирчян қаза тапты. Бұл оқиға елдің саяси тарихындағы қайғылы күндердің бірі ретінде қалды.
