ШҚО-ның Серебрянка қаласында төтенше жағдай қызметкерлері тұрғындарды абай болуға шақырды. Күні кеше ғана мұнда адамға аю шауыл жасаған,- деп хабарлайды Malim.kz.
Оқиға Арматура зауытынан 91 шақырым жердегі темір жолдың бойында болған. Аю екінші посттың жол бұрушы қызметкеріне тап берген. Абырой болғанда теміржолшы зардап шекпеген. Алайда, әлеуметтік желіде қала тұрғындары уайымдап жатыр. Айтуларынша, тұрғындарға құлақтандыру жұмыстарын жүргізу кезінде көлік көше бойында жоғары жылдамдықпен жүріп өткен.
- Хабарландыруды тыңдау үшін көліктің соңынан жүгіру керек болды. Құдды бір іздерінен аю қуып келе жатқандай, - деп шағымданды олар.
Ал енді Instagram-да жарияланған видеода азаматтар «аю» дегеніміз қонжық деп отыр. Оны теміржолшылар өлтіріп, видеоға түсіріп алыпты. Бұл әрекеттері әлеуметтік желі қолданушыларының наразылығын тудырып отыр.
- Қонжық болса, адамға шабуылдауы екіталай. Өлтіріп, фотосуретке түсіргені не қылық? Жануарларды қорғайтын министрлік қайда қарап отыр? – деп жазып жатқандар да бар.
Осыған байланысты төтеншеліктер тұрғындарға жыртқышқа тап болған жағдайда қалай әрекет ету керектігін ескертті.
Фото: Видеодан скрин
