Қате диагноз қойылды: ата-ана баласының өліміне дәрігерлерді кінәлап отыр

Қостанайда 7 жастағы қыздың ата-анасы дәрігерлерді баласының өліміне кінәлап отыр, - деп хабарлайды Malim.kz.kz TobolInfo-ға сілтеме жасап.

Қостанайда 7 жастағы Раяна Қабжанова қайтыс болды. Ол шамамен бір ай бойы тыныс алу жолдарының ауруына байланысты емделген. Қайғылы оқиғаға байланысты ата-анасы №3 қалалық емхана, жедел жәрдем және балалар ауруханасының дәрігерлерін кінәлайды.

Анасының айтуынша, 28 ақпанда қыз бала жөтеле бастаған, содан кейін №3 емханада оған антибиотиктер мен шәрбаттар жазып берген. 7 наурызда дәрігер мектепке баруға рұқсат беріп, еңбекке жарамсыздық парағын жапқан. Алайда бірнеше күннен кейін қыздың жағдайы нашарлап, отбасы қайтадан емханаға жүгінеді. Диагноз – ангина, симптоматикалық ем тағайындалған.

"Маған үнемі "қызыңызда ангина" деп, тек тамақты шаю керек екенін айтумен болды. 14 наурызда Ткачук деген дәрігерге бардық, сонда өзіміз антибиотикті ауыстыруды сұрадық. Ол келісіп, басқа дәрі жазды, бірақ қызымның дене қызуы түспеді", – деді Раянаның анасы.

Қайтадан жүгінгеннен кейін қыз бала ауруханаға жатқызылған. Оған "Цефазолин" тағайындалған, бірақ дене қызуы түспеген. Ананың айтуынша, ауруханада уақытылы көмек көрсетілмеген.

Тек ақылы палатаға ауыстырылғаннан кейін ғана "пневмония" диагнозы қойылған. 18 наурызда қыз бала жансақтау бөліміне ауыстырылған.

"18 наурызда сағат 16:00-де жұбайым ауруханаға барып, қызымыздың жағдайын сұрады. Дәрігерлер "бәрі жақсы" деді. Бірақ сол түні, 18-інен 19-ына қараған түнде Раянам қайтыс болды", – дейді әкесі Рүстем.

Ата-анасы полицияға арыз түсірді.

Фото: pixabay.com