Семейде баланы соққыға жыққан жасөспірімдердің ата-анасына үкім шықты

Семейде оқушыны соққыға жығып, видеоға түсірген жасөспірімдердің ата-анасына үкім шықты, - деп хабарлайды Malim.kz тілшісі.

Бұл іс Абай облысының кәмелетке толмағандардың істері жөніндегі мамандандырылған ауданаралық сотында қаралды. Семейде қатарласын соққыға жыққан жасөспірімдердің ата-аналарына қатысты әкімшілік іс бойынша үкім шыққан. 

Сот шешімі қандай?

Сот оларды балаларды тәрбиелеу жөніндегі ата-аналық міндеттерін тиісінше орындамағаны үшін кінәлі деп танып, Әкімшілік құқықбұзушылық туралы кодексінің (ҚР ӘҚБтК) 127-бабына сәйкес тиісті әкімшілік жазалар тағайындады.

"Сот қаулысымен бойынша Л.А., 5 тәулікке әкімшілік қамаққа алынса, Д.М., М.Т., Т.А. және А.Қ. әрқайсысына 78 640 теңгеден айыппұл салынды", - делінген хабарламада. 

Еске салайық, 24 ақпанда әлеуметтік желілерде жасөспірімдердің баланы жерге құлатып, теуіп, үстіне секіріп, қорлаған видеосы тарады. Абай облысының полиция департаменті оқушыны соққыға жығу дерегі бойынша қылмыстық іс қозғады. 

Кейін халық соққыға жығылған балаға 24 млн теңге жинап берді. Бұл қаражат баспана алуға жұмсалған. 

Фото: Видеодан алынған кадр