Күйеуінің үйге сирек келетінін қауіпсіздігіне байланысты деп ойлаған әйел оның жасырын екінші рет үйленгенін әлеуметтік желіден білген. Ер адам алғашқы жұбайына өзін полиция қорғап жүргенін айтса, екінші әйеліне ажырасқанын айтып сендірген, деп хабарлайды Malim.kz.
The Sun басылымы 2026 жылғы 28 қыркүйекте осы оқиғаға тап болған әйелдің әңгімесін жариялады.
Екеуі 2000 жылы танысып, 2008 жылы шаңырақ көтерген. Әйел күйеуін сыпайы, қамқор адам ретінде таныған. Ұзақ уақыт бірге болғандықтан, оның сөзіне күмәнданбаған.
Алайда кейін күйеуі жұмысына байланысты күрделі жағдайға тап болғанын жеткізген. Айтуынша, өзі жұмыс істейтін компаниядағы алаяқтық ісі бойынша куәгер болып, арнайы қорғау бағдарламасына енгізілген. Сондықтан отбасымен бірге тұра алмайтынын, полиция оны қауіпсіз үйге орналастырғанын айтқан.
Әйел бұл сөзге сеніп, күйеуінің үйге оралатын күнін күткен. Оның айтуынша, ер адам болған жағдайды ешкімге айтпауын талап еткен. Мұны екеуінің қауіпсіздігімен түсіндірген.
Күйеуі үйіне күніне шамамен екі сағатқа ғана келіп жүрген. Кейде қасында тағы бір ер адам болған. Оны азаматтық киімдегі полиция қызметкері деп таныстырған. Кейін әйел әлгі адамның күйеуі үнемі шақыратын такси жүргізушісі екенін білген.
Шын мәнінде, ер адам басқа әйелмен бірге тұрып жатқан. Ол жаңа сүйіктісіне алғашқы некесінің аяқталғанын айтып, ажырасуға қатысты жалған құжат көрсеткен. Тіпті туыстары мен таныстарына да бірінші әйелімен ажырасқанын жеткізген.
2013 жылы алғашқы жұбайы жүкті болған кезде, ол екінші әйелмен той жасаған. Екі әйел де оның шын жағдайынан хабарсыз болған.
Әйелдің айтуынша, күйеуі қызы дүниеге келгенде де жанында қалмаған. "Сыртта полиция күтіп тұр, мені қауіпсіз жерге алып кетуі керек" деген сылтаумен шығып кеткен.
Жасырын некені Facebook-тегі кездейсоқ видео әшкерелеген. Әйелдің сіңлісі мұздай су құю челленджіне қатысқан жездесін танып қалған. Видеоның жазбасында оның аты басқа әйелмен бірге аталған.
Сіңлісі парақшаға кіргенде, екеуінің той суретін көрген. Жаңалықты әпкесіне өзі айтуға батылы жетпей, оның жақын құрбысына хабарласқан. Осылайша әйел күйеуінің екінші отбасы барын білген. Ол кезде олардың қызы алты айлық болған.
Әйел полицияға жүгінгеннен кейін іс сотқа жеткен. Ер адам бірінші некесін бұзбай қайта үйленгенін мойындап, 2015 жылы сегіз айға бас бостандығынан айырылған.
Осы жағдайдан кейін әйел бұрынғы күйеуімен ажырасқан. Кейін өмірін қайта құрып, өз тәжірибесі туралы кітап жазған және қиын қарым-қатынастан зардап шеккен әйелдерге қолдау көрсете бастаған.
