Аида Балаеваның атынан төлемдер тағайындау туралы жалған ақпарат тарап жатыр
Әлеуметтік желілерде Мәдениет және ақпарат министрі Аида Балаеваның суретімен жалған жарнама тарап жатыр, деп хабарлайды Malim.kz.
Мәтінде Мемлекет басшысы қазақстандықтарға төлемдер тағайындауды тапсырғаны айтылған. Stopfake.kz сайты бұл жарнаманың жалған екенін жазды.
Жалған жарнаманы таратушылар күмәнді сілтеме бойынша өтуді ұсынады. Қандай сома тағайындалғанын білу үшін адам жеке тұлғаның бірегей нөмірін (ЖСН) енгізуге тиіс. Белгісіз сайттарда жеке деректерді қалдырмаған жөн. Алаяқтар оларды жеке мақсатта пайдаланады. Қазақстан Президенті Қасым-Жомарт Тоқаевтың ресми сайтында төлемдер туралы ақпарат болмаған және жоқ, - делінген хабарламада.
Сондай-ақ Мәдениет және ақпарат министрлігі де барлық жаңалықтарды ресми порталда жариялайды. Онда да төлемдер туралы ақпарат болған жоқ.
Мұндай хабарламаға сенбеген жөн. Бұл алаяқтардың ісі. Бұған дейін Желіде ҚР Қаржы министрлігі мен Ұлттық қордың атынан төленетін төлемдер туралы осындай фейк ақпараттар тараған болатын, - деп жазды stopfake.kz. сайты.
Фото: time.kz
