Артында бес баласы қалды: шахтада қаза тапқан Олжас Нұрұлдаев жерленді
Қайғылы жағдай 17 ақпан күні болды.
«Қазақмыс» корпорациясына қарасты «Жомарт» кенішінде қаза тапқан азамат Олжас Нұрұлдаевтың артында бес баласы қалды. Бұл туралы ulysmedia.kz сайтына сілтеме жасай отырып Malim.kz хабарлайды.
Марқұмның туысы Серік Дүйсенұлының айтуынша, Олжас Нұрұлдаевтың артында төрт ұлы мен бір қызы қалды. Сонымен қатар марқұмның жары, анасы, інісі мен қарындасы бар.
Алла алдынан жарылқасын. Ініміздің қазасы біз үшін орны толмас қайғы. Ол орны бөлек азамат еді. Үлкен әкесінен алған тәрбиесі мен жөн-жобасы бар, ізімізді басып келе жатқан бауырымыз болатын. Үкімет берген уәдесінде тұрып, балаларына қажетті жағдайды жасап берсе дейміз. Балаларының үлкені 24 жаста, кенжесі екіде, деді Серік Дүйсенұлы.
Еске салсақ, 17 ақпанда «Қазақмыс» корпорациясына тиесілі «Жомарт» кенішінде 640 метр тереңдікте тау жынысы опырылып, үйінді астында қалған жеті жұмысшы қаза тапты.
Фото: Видеодан скрин
