Біржолғы әлеуметтік төлем туралы жалған ақпар қайта тарай бастады
Бірақ ешбір мемлекеттік орган сайтында ондай мәлімет жоқ
Әлеуметтік желілерде бір реттік әлеуметтік төлем туралы жалған хабарлама тағы тарала бастады. Алаяқтар ақпарат шынайы болып көрінуі үшін Қазақстан президенті Қасым-Жомарт Тоқаевтың бейнесін пайдаланған, деп хабарлайды Malim.kz.
STOPfake.kz жазуынша, хабарландыруда әрбір қазақстандыққа 150 мың теңгеден беріледі делінген. Себебі, жаңа мемлекеттік бағдарлама іске қосылыпты-мыс. Бұл жалған.
Алаяқтардың айтуынша, төлем туралы бірқатар министрлік хабарлаған. Біз бұл ақпаратты тексердік. Бірде-бір мекеме мұндай жаңалықты жарияламаған, Еңбек және халықты әлеуметтік қорғау министрлігінің сайтында да, Қаржы министрлігінің сайтында да ештеңе жоқ. Алаяқтар атап өткен «ҚР қайырымдылық қоры» деген қор да жоқ, деп жазды сайт.
Сайт келтірген алаяқтардың мәліметінде бұл мемлекеттік бағдарлама Halyk Bank-пен бірлесіп іске асырылып жатыр. Бірақ қаржы мекемесінің ресми порталында төлемдер туралы айтылмаған.
Мемлекет басшысының ресми сайтында да мұндай ақпарат жоқ.
Қылмыскерлер берген сілтемеде азаматтар төлемнің бар-жоғын тексеру үшін ЖСН теруге тиіс. Бұл айла. Күмәнді сайтта деректерді қалдыра отырып, сіз өзіңіз туралы маңызды ақпаратты белгісіз адамдарға бересіз. Олар оны өз мақсатында пайдалана алады, деп жазды сайт.
Фото: stopfake.kz
Байланысты жаналықтар
MalimBlocks
