Мәди Ахметов сабағы: Қазақ еліне + 50 су жорға депутат
Бұл енді, ана орыстың Матрешкасы сияқты дүние ғой. «Нұр-Отанның» ішінде «Аманат» бар, «Аманаттың» ішінде «академия», академия ішінде «саяси мектеп» тағысы тағы дегендей. Шаршамай аша берсеңіз, депутат Мәди Ахметовке жетесіз.
Мәди Ахметов мәжілістегі ең жас депутат. 25 жасында мандат алды. Рас, депутаттық мандат алмай тұрып, Н. Назарбаевқа Алматыдан ескерткіш орнатайық деп жанықты. Жасына, жолына қарамай, 30 жылдық супер тәжірибесі бар кәсіби жағымпаздарды шаңға көміп кетті. «Дәніккеннен құныққан жаман» дейді ғой, одан кейін Н. Назарбаев пен Қ. Тоқаев телқоңырдай теңселіп тұрған шақта «дауыс беруге шақырамын» деп өңешін жыртқанын да көрдік. Негізі, «жүре берсең, көре бересің» деген рас екен. Н.Назарбаевқа ескерткіш қоюды өмірлік мұратым деп білген жас өрен күні кеше парламентте тұңғыш президентке қатысты ерекше заңдар қысқарып, күзетіліп жатқанда ләм демеді. Астананың атауы қайтып, Нұр-Сұлтан белден басылып жатқанда қыңқ демеді.
Елдің көзіне "қаңтарға дейінгі Қазақстан басқа, қаңтардан кейінгі Қазақстан басқа" деп осындай құбылмалы қабілетімен түскен Мәди Ахметов кеше әлеуметтік желіде жас саясаткерлердің жаңа буынына қатысты жазба жазыпты.
Білдей депутаттың, бас-аяғы түсініксіз жазбасын бірнеше мәрте оқып, дым ұқпаған соң, мәжілістің сайтына кіріп қарасам, Мәди Ахметов елу шақты жас саясаткерге сабақ өтіпті!
Жас саясаткерлердің ұстазы анау-мынау емес, Мәди Ахметовтің өзі болса, қазақ еліне + 50 су жорға депутат жақын күнде қосылады десеңізші.
Фото:parlam.kz
Самое читаемое
