Испанияның бұрынғы өкімет басшысы Мариано Рахойдың футбол туралы мақаласы тудырған дау спорт әлемінен бұрын саясат сахнасын дүрліктіріп жіберді, деп хабарлайды Malim.kz.
Аталған саясаткердің әлем чемпионатына арналған кезекті авторлық мақаласы да дау алаңына айналды. Испанияның жартылай финалдағы қарсыласы – Франция құрамасы туралы ол: «Өте жоғары деңгейдегі команда, рас, бірақ француздарсыз» деп жазды.
Алайда оның осынау мәлімдемесі шындықпен жанаспайды, жанкүйерлер пікірінше. Франция құрамасының бас бапкері Дидье Дешам әлем чемпионатына шақырған 26 футболшының үшеуі ғана Франциядан тыс жерде дүниеге келген.
Олар - Лондонда туған Майкл Олисе (әкесі – нигериялық текті Ұлыбритания азаматы, анасы – алжирлік тамыры бар Франция азаматы), Италияның Парма қаласында дүниеге келген Маркус Тюрам (сол кезде әкесі Лилиан Тюрам Италияда өнер көрсеткен) және Конго Демократиялық Республикасында туған Брис Самба. Үшеуі де Франция азаматтығына ие және негізінен Францияның жас футболшыларды даярлау жүйесінде тәрбиеленіп, кәсіби шеберлігін шыңдаған.
Аталған ұшқары пікір Испания мен Франция саясаткерлері тарапынан нәсілшілдік сипаттағы мәлімдеме ретінде бағаланды.
Франция Коммунистік партиясының ұлттық хатшысы Фабьен Руссель Х әлеуметтік желісінде жариялаған жазбасында Мариано Рахойдың мәлімдемесін айыптауға шақырды. Ол El Debate басылымындағы мақаланы Парагвай сенаторының Франция құрамасының капитаны Килиан Мбаппеге қатысты нәсілшілдік сипаттағы пікірлерімен салыстырды.
Аталған мәлімдемелерден кейін Париж прокуратурасы «ауырлататын мән-жайлармен жасалған жария қорлау» дерегі бойынша тергеу бастады. Тергеуге Франция футбол федерациясының Париждегі интернеттегі өшпенділікпен күрес жөніндегі ұлттық орталыққа берген шағымы негіз болды.
«Олар біздің тамаша Франция құрамамызды ашуландыру үшін жиіркенішті нәсілшілдіктен ешқашан бас тарта алмайды!» – деп жазды Фабьен Руссель.
Испания премьер-министрі Педро Санчес пен Франция президенті Эммануэль Макрон өз құрамаларының жартылай финалын бірге тамашалауы әбден мүмкін. Өйткен бүгін Парижде елдің Ұлттық күні аталып өтілуде.
